Ալեն Սիմոնյանը վերահաստատում է, որ ռեյտինգային ընտրակարգով ևս ՔՊ-ն պատրաստ է խորհրդարանական ընտրություններին
2 րոպեի ընթերցում
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: «Ելք» խմբակցության պատգամավոր Ալեն Սիմոնյանը վստահեցնում է, որ ռեյտինգային ընտրակարգը ՔՊ-ի համար ևս ընդունելի տարբերակ է:
«Արմենպրես»-ի հաղորդմամբ` Սիմոնյանը նման տեսակետ հայտնեց ԱԺ-ում ԸՕ բարեփոխումների փաթեթի չընդունումից հետո՝ լրագրողների հետ զրույցում:
«Ընտրությունների կգնանք գործող օրենսգրքով: Եվ կտեսնենք, թե այն մարդիկ, ովքեր դեմ էին քվեարկում, կամ հիվանդ էին, կկարողանա՞ն անցնել ԱԺ: Ռեյտինգային ընտրակարգը մեզ համար ընդունելի տարբերակ է: Մենք այդ համակարգով նախորդ ընտրություններում ավելի շատ ձայն ենք հավաքել, քան ՀՅԴ-ն»,-ասաց Ալեն Սիմոնյանը:
Նա նաև նկատեց՝ եթե ընտրակաշառք բաժանելու հնարավորություն լինի, դա բաժանվելու է անկախ ռեյտինգային կամ համամասնական ընտրակարգից: Բայց իրենք Երևանի ավագանու ընտրություններով ցույց են տվել, որ այդ հնարավորությունը չկա և չի լինելու, քանի դեռ իրենք իշխանության են:
«Մենք վերջին խորհրդարանական ընտրություններին մասնակցել ենք ռեյտինգային ընտրակարգով և դարձել ենք երրորդ ուժն այն ժամանակ, երբ մեր դեմ աշխատել է ՀՀ ողջ պետական համակարգը, նաև գործարարները, ովքեր ընտրակաշառք են բաժանել»,-եզրափակեց Սիմոնյանը:
ՀՀ ազգային ժողովում երկրորդ անգամ գումարված արտահերթ նիստում Ընտրական օրենսգրքի բարեփոխումների փաթեթը կրկին չստացավ բավարար ձայներ: Բարեփոխումների փաթեթին կողմ քվեարկեց 62 պատգամավոր, դեմ՝ 2 պատգամավոր, ձեռնպահ պատգամավոր չկար: Փաթեթի ընդունման համար անհրաժեշտ էր 63 կողմ ձայն: ՀՅԴ խմբակցության երկու պատգամավորներ չէին ներկայացել նիստին: