1 րոպեի ընթերցում
ԳՅՈՒՄՐԻ, 12 ՓԵՏՐՎԱՐԻ, ԱՐՄԵՆՊՐԵՍ: Գյումրու քաղաքապետարանում փետրվարի 12-ին տեղի ունեցավ խորհրդակցություն, որի առանցքում Գյումրու Կումայրի պատմական կենտրոնի զարգացման ծրագրի շրջանակներում «Շիրազի» և դրան հարող փողոցների վերակառուցման աշխատանքներն էին:
Խորհրդակցությունը գլխավորում էին ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը, ՀՀ կառավարությանն առընթեր քաղաքաշինության պետական կոմիտեի նախագահի տեղակալ Արմեն Ղուլարյանը, Գյումրու քաղաքապետ Սամվել Բալասանյանը: Խորհրդակցությանը մասնակցում էին նաև բոլոր այն կառույցների ղեկավարներն ու ներկայացուցիչները, ովքեր առնչություն ունեն վերը նշված փողոցների վերակառուցման աշխատանքներին:
Հանդիպման ընթացքում խոսվեց «Շիրազի» փողոցում հողային աշխատանքների մեկնարկի ժամանակացույցի, ենթակառույցների անելիքների և մի շարք այլ հարցերի մասին: Բարձրացված յուրաքանչյուր հարց, ըստ ոլորտային աշխատանքի, տեղում քննարկվեց, անհրաժեշտության դեպքում լուծումներ առաջարկվեցին, պատասխանատուները ստանձնեցին պարտավորություններ՝ աշխատանքների բնականոն ընթացք ապահովելու նպատակով:
Արմենուհի Մխոյան