2 րոպեի ընթերցում
ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի գրողների միությունը տարբեր խորհրդակցությունների և մրցանակաբաշխությունների անցկացմամբ մեծ ուշադրություն է դարձնում երիտասարդ գրողներին:
«Արմենպրես»-ի հաղորդմամբ՝ դեկտեմբերի 15-ին լրագրողների հետ հանդիպմանն այս մասին ասաց Հայաստանի գրողների միության նախագահ Էդվարդ Միլիտոնյանը:
«Գրականության ինստիտուտում մենք կազմակերպել ենք Երիտասարդ գրականագետների երկօրյա համաժողով: Դրանում երիտասարդները ներկայացնում են իրենց գրականագիտական գործերը՝ ընդհանուր 36 զեկույց՝ դասական և ժամանակակից գրական իրողությունների վերաբերյալ»,-ասաց Միլիտոնյանը:
Նրա խոսքով՝ նաև ամեն տարի ավանդաբար Ծաղկաձորի ստեղծագործական տանը մի քանի օր տրամադրում են երիտասարդ գրողների խորհրդակցություն անցկացնելուն: «Այս տարի հունիսի առաջին տասնօրյակում մենք 3 օր կազմակերպեցինք այն՝ Վրաստանի, Ջավախքի, Արցախի երիտասարդ գրողների մասնակցությամբ: Նրանք ներկայացրեցին իրենց ստեղծագործությունները, անցկացվեցին վարպետության դասեր»,-ասաց Գրողների միության նախագահը:
Գրական մամուլում երիտասարդների համար է նախատեսված նաև «Գրեթերթ»-ը: «Հատուկ երիտասարդների համար ունենք նաև մրցանակաբաշխություններ՝ Լևոն Անանյանի անվան գրական մրցանակ: Իսկ «Արարատ Մկրտումյան» ամենամյա գրական-երիտասարդական մրցանակաբաշխությունը կազմակերպվում է Շիրակում: Սակայն հաջորդ տարի այն կլինի Լոռիում: Ամեն տարի տարբեր մարզերում անցկացնելով՝ կընդլայնենք շրջանակը»,-ասաց Միլիտոնյանն ու հավելեց՝ երիտասարդ գրողների համար նախատեսված մրցանակները շատ են: