3 րոպեի ընթերցում
ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Հրատարակիչ, խմբագիր, քիմիական գիտությունների դոկտոր Հովհաննես Այվազյանը լայն մտահորիզոն ունի. նա պայքարող և արարող տեսակ է: Այս մասին նոյեմբերի 7-ին գիտնականի ծննդյան 70-ամյակին նվիրված հանդիսությանն ասաց Հայաստանի գրողների միության նախագահ Էդվարդ Միլիտոնյանը: Միջոցառումն անցկացվեց ՀՀ գիտությունների ազգային ակադեմիայում:
«Աշխատանքի բերմամբ բազմիցս առնչվել եմ Հովհաննես Այվազյանի հետ: Հրաշալի է հանրագիտարանների այն շարքը, որը տպագրվել է նրա օրոք: Չնայած բոլոր դժվարություններին`իննսունականներին նա կարողացավ համախմբել հանրագիտարանի վրա աշխատող բոլոր մարդկանց և չհանձնվեց, շարունակեց հանրագիտարանների հրատարակումը, որոնք մենք պատվով ենք ներկայացնում միջազգային ցուցահանդեսներում»,-«Արմենպրես»-ի հաղորդմամբ` նշեց Էդվարդ Միլիտոնյանը: Նա ՀԳՄ բոլոր անդամների անունից շնորհավորեց Հովհաննես Այվազյանին`նորանոր հաջողություններ մաղթելով նրան:
ԵՊՀ պատմության ֆակուլտետի դեկան Էդիկ Մինասյանի խոսքով` Հովհաննես Այվազյանը բեղուն և արգասաբեր գիտական գործունեություն է ծավալել:
«Զորավար Անդրանիկին, Հովհաննես Թումանյանին նվիրված նրա աշխատանքները պատմագիտական մտքի հրաշալի գործեր են: Հետաքրքիր են նրա գեղարվեստական գրքերը, կարևորում եմ նաև հայրենասիրական ոգով լեցուն հոդվածները, որոնք տվել են իրենց պտուղները: Շնորհավորում եմ, մաղթում եմ նոր հանրագիտարաններ հրատարակել»,-եզրափակեց նա: Դեկանը ֆակուլտետի կոլեկտիվի կողմից ոսկե ժամացույց նվիրեց գիտնականին:
«Ինձ հաջողակ մարդ եմ համարում. ունեմ հիանալի ընտանիք, թոռնիկներ, որոնք իմ կողքին են: Իմ ջանքերով հրատարակվել է տասներկու հանրագիտարան: Քսան տարի Հայկական հանրագիտարանի գլխավոր խմբագրի տեղակալ եմ եղել և ևս քսան տարի գլխավոր խմբագիր, մասնակցել եմ դրա բոլոր հրատարակությունների լույս ընծայմանը»,-ասաց Հովհաննես Այվազյանը:
Գիտնականը շեշտեց, որ երազում է Հայոց ազգային հանրագիտարանի նոր հրատարակության մասին: «Լավ է, որ մեր երկրում թեմատիկ հանրագիտարաններ կան: Բայց Հայոց ազգային հանրագիտարանը չափազանց մեծ նշանակություն կարող է ունենալ մեր երկրի համար: Հուսամ` կկարողանամ իրականացնել երազանքս»,-ասաց նա:
Միջոցառմանը Հովհաննես Այվազյանը գրական, հրատարակչական, հասարակական գործունեության համար պարգևատրվեց ԵՊՀ ոսկե մեդալով:
Նրան «Ջավախք» հայրենակցական բարեգործական միության պատվավոր անդամի կոչում շնորհվեց: