Արտասահմանյան ֆիլմերի նկարահանումները Հայաստանում կնպաստեն տեղական արտադրության զարգացմանը. Արմեն Ամիրյան
2 րոպեի ընթերցում
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Արտասահմանյան կինոարտադրությունները Հայաստանում ճիշտ կազմակերպելու դեպքում ստացված եկամուտները կուղղվեն հայրենական կինոյի զարգացմանը: Նկարահանումները Հայաստանում կարող են նպաստել նաև համատեղ կինոարտադրություններ սկսելուն: «Արմենպրես»-ի հաղորդմամբ՝ լրագրողների հետ ճեպազրույցում այս մասին ասաց ՀՀ մշակույթի նախարար Արմեն Ամիրյանը:
«Ես համամիտ չեմ այն մտավախությանը, թե «Կինոյի մասին» օրենքի նոր նախագիծը վերաբերում է միայն արտասահմանյան կինոարտադրությանը: Այսօր բացակայում են արտասահմանյան կինոարտադրությունը Հայաստանում կազմակերպելու դրույթները և դրա հետ կապված բոլոր գործառույթները: Մենք ուզում ենք կանոնակարգել և օրենքով այդ գործառույթներն օգտագործել՝ ի շահ հայաստանյան արտադրողների»,-ասաց նախարարն ու հավելեց, որ արտասահմանյան նկարահանումները Հայաստանում նաև հնարավորություն կստեղծեն հայկական ֆիլմերն արտերկրում վաճառելու համար:
Ամիրյանի խոսքով՝ «Կինոյի մասին» օրենքի մշակման ուղղությամբ վերջին մեկ տարում բազմաթիվ քննարկումներ են ունեցել և պատրաստ են նորից քննարկելու: «Սակայն կցանկանայի՝ այս տարի ավարտենք քննարկումները և հանձնենք կառավարություն, ապա՝ ԱԺ: Ուզում եմ՝ ԱԺ ուղարկվող օրենքի նախագիծը լինի գրեթե անթերի»,-նշեց նա:
«Կինոյի մասին» օրենքի նախագիծը շոշափում է կինոինդուստրիայի զարգացման խնդիրները: