2 րոպեի ընթերցում
ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: «Արամ խաչատրյան» համերգասրահում դեկտեմբերի 4-ին տեղի կունենա հոբելյանական համերգ` նվիրված ՀՀ ժողովրդական արտիստ Հովհաննես Բադալյանի ծննդյան 90-ամյակին: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, համերգին կմասնակցեն Հովհաննես Բադալյանի սաները, Հայաստանի ազգային նվագարանների պետական նվագախումբը՝ գեղարվեստական ղեկավար և գլխավոր դիրիժոր ՀՀ վաստակավոր արտիստ, պրոֆեսոր Նորայր Դավթյանի ղեկավարությամբ:
Հովհաննես Բադալյանի երգացանկի ամենավառ գործերը՝ «Ես իմ անուշ Հայաստանի», «Ասում են թե», «Հորովել», «Մայրիկիս», «Միայն թե մայրս չիմանա», «Քամանչա», «Երկու ընկեր», «Մայրական ձեռքեր», «Սարերի հովին մեռնեմ», «Երևանի ջուրը» երգերը համերգի ընթացքում կհնչեն ՀՀ վաստակավոր արտիստներ Համլետ Գևորգյանի, Արսեն Գրիգորյանի (Մրո) և այլոց կատարմամբ:
Երեկոյի ընթացքում կցուցադրվի արվեստագետի կյանքն ու գործունեությունը ներկայացնող ֆիլմ, կհնչեն նաև նրա կատարումներից: Հովհաննես Բադալյանի գործընկերների՝ ՀՀ ժողովրդական արտիստներ Օֆելյա Համբարձումյանի, Վլադիլեն Բալյանի, Անժելա Աթաբեկյանի և Ռուբեն Մաթևոսյանի խոսքը կներկայացվի տեսանյութերով:
Համերգը կանցկավի ՀՀ մշակույթի նախարարության աջակցությամբ և «Ժողովրդական երաժշտության ազգային կենտրոնի» նախաձեռնությամբ: