2 րոպեի ընթերցում
ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Գերմանաֆրանսիական Arte հեռուստաալիքը 2016 թվականի հունվարի 3-ին կցուցադրի ֆրանսահայ լեգենդար երգիչ Շառլ Ազնավուրի` Փարիզի Palais des Sports սրահում կայացած համերգը: Ինչպես տեղեկացնում է «Արմենպրես»-ը՝ վկայակոչելով concert.arte.tv կայքը, ցուցադրվելիք նյութը նկարահանվել է սեպտեմբերի 15-ին անցկացված համերգին:
Հեռուստաալիքի կայքը տեղեկացնում է, որ իր 70-ամյա գործունեության ընթացքում Ֆրանսիա գաղթած հայ ռեստորանատերի որդին կառուցել է միջազգային մասշտաբի ամենաէական ժառանգություններից մեկը:
Ազնավուրի պաշտոնական ֆեյսբուքյան էջն էլ տեղեկացնում է, որ համերգը CD և DVD տարբերակներով հասանելի կլինի դեկտեմբերի 11-ից:
Ֆրանսահայ լեգենդար երգիչ Շառլ Ազնավուրն այս տարվա սեպտեմբերի 15-27-ն ընկած ժամանակահատվածում Փարիզի Palais des Sports սրահում հանդես է եկել միանգամից վեց համերգով: Ազնավուրը կատարել է իր ամենահայտնի և նոր` «Encores» ալբոմի ստեղծագործությունները:
Նշանավոր ֆրանսահայ երգիչ, երգահան, կինոդերասան և հասարակական գործիչ Շառլ Ազնավուրը ծնվել է 1924 թվականի մայիսի 22-ին Փարիզում: Բազմաթիվ հայտնի գործերի հեղինակ և կատարող է: Վաճառվել է Ազնավուրի ստեղծագործություններն ամփոփող շուրջ 100 միլիոն ձայնապնակ: 2009 թվականից Ազնավուրը Շվեյցարիայում Հայաստանի դեսպանն է, ինչպես նաև Ժնևի ՄԱԿ-ի գրասենյակում և այլ միջազգային կազմակերպություններում Հայաստանի մշտական ներկայացուցիչը: Լեգենդար երգիչը հոկտեմբերի 10-ին համերգով հանդես է եկել Հայաստանում, այցի ընթացքում եղել տարբեր վայրերում ևհարցազրույց է տվել «Արմենպրես»-ին: