Սիրիայում այս տարվա ընթացքում ԻՊ-ի շարքերում ընդգրկված 52 երեխա է զոհվել
2 րոպեի ընթերցում
![Սիրիայում այս տարվա ընթացքում ԻՊ-ի շարքերում ընդգրկված 52 երեխա է զոհվել](http://armenpress.am/resized/480/static/news/b/2015/07/812411.jpg)
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: Սիրիայում այս տարվա սկզբից «Իսլամական պետության» շարքերում կռվող 52 երեխաներ են զոհվել: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, այս մասին տեղեկացրել են սիրիացի ընդդիմադիր ակտիվիստները: Նրանց խոսքով՝ հունվարից ի վեր 52 երխաներ են սպանվել, որոնց տարիքը չի հասնում 16-ի: Նրանցից 31-ը զոհվել են պայթյունների, բախումների և միջազգային դաշինքի, ինչպես նաև օդային հարվածների հետևանքով:
Մյուսները որպես մահապարտ-ահաբեկիչներ իրենք իրենց պայթեցրել են:
Ավելի վաղ տեղեկություններ էին ստացվել, որ ԻՊ-ն երեխաներին ընդգրկում է իր շարքերում: Տեղեկություններ կան, որ 2015թ-ի սկզբից մինչ հուլիս ամիսը, ԻՊ-ի շարքերում ընդգրկվել են ավելի քան 1100 երեխաներ:
«Իսլամական պետություն» իսլամիստական ահաբեկչական կազմակերպությունը գործում է Սիրիայի և Իրաքի տարածքներում: 2013 թ. ապրիլին «Ալ Քաիդա»-յի երկու ճյուղերի միավորման արդյունքում ձևավորվել է խմբավորում՝ «Իրաքի և Լևանտի իսլամական պետություն» անվանումով, որի նպատակն էր կազմավորել իսլամական էմիրություն Լիբանանի, Սիրիայի և Իրաքի տարածքներում: 2014թ. հունիսի 29-ին ԻԼԻՊ-ը Սիրիայի և Իրաքի գրաված տարածքներում հայտարարել է Իսլամական խալիֆաթ հիմնելու մասին, որի խալիֆ է նշանակվել Աբու Բաքր ալ Բաղդադին: Այնուհետև կազմակերպության անվանումը փոխելու որոշում է ընդունվել, և այն վերանվանվել է «Իսլամական պետություն»: Խմբավորման կազմում կռվում են շուրջ 80 երկրի ապստամբներ: