Կրթական հարցերով հանձնաժողովը Քնեսեթին Հայոց ցեղասպանությունը ճանաչելու կոչ է արել

ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Իսրայելի օրենսդիր մարմնի կրթական հարցերով հանձնաժողովը կոչ է արել Քնեսեթին ճանաչել Հայոց ցեղասպանությունը: Այս մասին «Արմենպրես»-ը տեղեկացավ Հայ դատի կենտրոնական խորհրդի պաշտոնական կայքէջից: Հանձնաժողովը նույն կոչով դիմել է նաև Իսրայելի կառավարությանը՝ Կրթության նախարարությաններկայացուցչին հանձնարարելով այսուհետ ավելի խորացնել Հայոց ցեղասպանության ուսումնասիրությունը և դրա մասին ուսուցումը:Հանձնաժողովում մեկուկես ժամ տևած քննարկմանը ելույթ է ունեցել նաև Հայ դատի Երուսաղեմի հանձնախմբի ներկայացուցիչ Ժորժետ Ավագյանը:

Հայոց ցեղասպանության ճանաչման բանաձևը հրեա պատգամավորների ուշադրության կենտրոնում հայտնվել էր դեռ մայիսի 12-ին, երբ «Մերես» կուսակցության ղեկավար Զահավա Գալ-Օնն այն օրակարգում քննարկելու առաջարկությամբ հանդես եկավ: Հարցը այն ժամանակ փոխանցվեց կրթության, գիտության և սպորտի հանձնաժողովին: Իսկ հունվարի 28-ին Իսրայելի նախագահ Ռեուվեն Ռիվլինը, ՄԱԿ-ի Գլխավոր վեհաժողովում ելույթ ունենալով Հոլոքոստի զոհերի հիշատակի միջազգային օրվա կապակցությամբ, անուղղակիորեն ճանաչել էր 1915 թ. Հայոց ցեղասպանությունը: Նա խոսել էր Հայոց ցեղասպանության մասին՝ ակնարկելով, որ ողբերգություն վերապրած ազգերը պետք է կարողանան կիսել նաև մյուսների ցավն ու տառապանքը: