Ասիայի և Աֆրիկայի գրողների միության փոխնախագահը Ցեղասպանության տարելիցի կապակցությամբ բաց նամակ է հղել հայ ժողովրդին
2 րոպեի ընթերցում
ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ: Ասիայի և Աֆրիկայի գրողների միության փոխնախագահ դոկտոր Մուաֆակ Մահհադին Հայոց ցեղասպանության 100-րդ տարելիցի կապակցությամբ բաց նամակ է հղել հայ ժողովրդին: «Արմենպրես»-ի հաղորդմամբ՝ նամակում ասված է.
«Մեր բարեկամ հայ ժողովրդին,
Հայ ժողովրդի բարեկամներին,
Հայաստանի բարեկամ գրողներին և մտավորականներին,
Մեզանում՝ արաբական աշխարհում, գոյություն ունի մի ասացվածք՝ «Իրավունքը չի կորչի, եթե պահանջատեր ունի»: Մենք վստահ ենք, որ հայ ժողովրդի նման հնագույն, արի և քաղաքակիրթ մի ազգ չի մոռանա իր իրավունքներն ու առանց պատժի չի թողնի ոճրագործին, որքան էլ ժամանակն անցնի: Բավական է հիշել, որ այս ոճրագործության հանդեպ լռությունը հանգեցրել է հաջորդ տասնամյակներին ավելի շատ հանցագործությունների իրականացմանը:
Երբ խոսում ենք հայ ժողովրդի նկատմամբ կատարված հանցագործության մասին, խոսում ենք հավաքական ցեղասպանության վերաբերյալ՝ առանց խաղերի կամ լեզվական հնարքների: Մենք խոսում ենք ոչ թե անհայտ հանցագործության, այլ Օսմանյան քաղաքականության և նրա պարագլուխների՝ 19-րդ դարի վերջին տասնամյակներից սկսած մինչև 1915թ. և ընդհուպ մինչև վերջերս Քեսաբում ու Սիրիայի այլ քաղաքներում կատարվածի մասին:
Անընդունելի է նաև ներումը կամ հաշտեցումը Ցեղասպանության ճանաչումից առաջ: Նույնպես անընդունելի է ճանաչումը փոխարինել հատուցմամբ: Միջազգային օրենքում և նորմերում պետք է վերջ տրվի ժխտողականությանը:
Այս կապակցությամբ պետք է նշել հետևյալ փաստերը՝
- 1910թ. Հորդանանի հարավում գտնվող ալ-Քարաքի ապստամբությունից հետո մինչև 1916թ. Օսմանյան բռնակալության դեմ հեղափոխությունը, արաբները ևս ենթարկվել են թուրքական արյունահեղության և կախաղանին: Նրանք առաջիններից էին, որ համերաշխություն հայտնեցին հայերին, և նրանց առջև բացեցին իրենց տները: Մեքքայի Շերիֆ ալ-Հուսեյն Բեն Ալին իր հրովարտակով կոչ էր անում համերաշխություն հայտնել դժբախտ հայ ժողովրդին:
- Արաբ գրողների, մտավորականների և արվեստագետների հետաքրքրությունը Հայկական հարցով և լուսաբանումն իրենց աշխատություններում:
Հառնեց Հայաստանը, իրոք հառնեց»: