Հայաստանը կարող է դառնալ ցեղասպանությունների դեմ պայքարի միջազգային հարթակ. Շարմազանով
1 րոպեի ընթերցում
ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետական կուսակցությունը վերահաստատում է այն դիրքորոշումը, որ Հայաստանը կարող է դառնալ ցեղասպանություն հանցագործության դեմ պայքարի միջազգային հարթակ: Այս մասին ՀՀԿ գործադիր մարմնի նիստի ավարտից հետո լրագրողների հետ հանդիպմանը նշեց ՀՀԿ խոսնակ, ՀՀ ԱԺ փոխնախագահ Էդուարդ Շարմազանովը: «Մենք արդեն համոզվել ենք, որ Հայաստանը դատապարտում է ոչ միայն Հայոց ցեղասպանությունը, այլ նաև բոլոր ցեղասպանությունները և ակտիվ պայքար է մղում ցեղասպանությունների ժխտողականության դեմ: Ասեմ նաև, որ մենք ամեն տարի Հայաստանում կանցկացնենք ցեղասպանությունների դատապարտմանը նվիրված ֆորումներ, ինչպիսին եղավ օրեր առաջ Երևանում»,- «Արմենպրես»-ի հաղորդմամբ՝ ընդգծեց Շարմազանովը:
Նա հայտնեց, որ ՀՀԿ ԳՄ նիստի ընթացքում քննարկվել են ապրիլքսանչորսյան միջոցառումները, ի մի են բերվել կատարված աշխատանքները: Նա ընդգծեց, որ կուսակցությունը ևս մեկ անգամ ամրագրել է այն դիրքորոշումը, որ Հայոց ցեղասպանության 100-րդ տարելիցով հայ ժողովրդի պայքարը չի ավարտվել, այլ թևակոխում է նոր փուլ: