Սիրիական բանակը Դեր Զորում ահաբեկչական հարձակում է կանխել

ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ:Դեր Զորի ռազմական օդանավակայանի շրջակայքում վերսկսվել են բախումները սիրիական բանակի և «Իսլամական պետություն» կազմակերպության միջև: Ինչպես հաղորդում է«Արմենպրես»-ը՝ վկայակոչելով արաբական լրատվամիջոցները, սաուդացի ապստամբներից մեկը փորձել է ականապատ մեքենա պայթեցնել օդանավակայանի մերձակայքում: Սակայն, բանակը կրակ է բացել մեքենայի ուղղությամբ, և այն հաջողվել է կանգնեցնել նախքան օդանավակայանին մոտենալը: Տեղի ունեցած պայթյունից ավելի քան 20 ահաբեկիչներ են սպանվել: Օդանավակայանը շարունակում է գործել և մնալ բանակի հսկողության տակ:

Ակտիվիստների տեղեկացմամբ` զինյալները հսկողություն են հաստատել Արևմտյան Ղուտայի Դարիա քաղաքի մոտ գտնվող, բանակին պականող մի քանի կետերի վրա: Տեղի ունեցած բախումների ժամանակ ավելի քան 20 զոհեր են գրանցվել 2 կողմերում:

Դարաայում և մերձակա գյուղերում, մասնավորապես, Շեյխ Միսքին գյուղում զինյալների և բանակի միջև բախումների ընթացքում զոհեր և վիրավորներ են գրանցվել:

Բանակը նաև հարձակում է գործել ընդդիմադիրների թաքստոցների վրա Ջաբալա Արաբիի, ինչպես նաև Բազզե ագարակի շրջակայքում:

Քրդական ուժերի և իսլամիստների միջև բախումներ են ընթանում նաև Ղամիշլի քաղաքի մերձակայքում: Բացի այդ, ԻՊ-ն շարունակում է հարձակումներ իրականացնել Հոմսի Աշ Շաար գազային դաշտի վրա:

Սիրիական հակամարտության մոտ 4 տարիների ընթացքում բախումների զոհ է դարձել 200 հազարից ավելի մարդ: