Սերժ Սարգսյանի հետ հանդիպումից առաջ ԵԱՀԿ ՄԽ համանախագահները հանդիպել են Իլհամ Ալիևին
1 րոպեի ընթերցում
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Ադրբեջանի նախագահ Իլհամ Ալիևն ընդունել է ԵԱՀԿ Մինսկի խմբի համանախագահներ Իգոր Պոպովին (Ռուսաստան), Յան Քելլիին (ԱՄՆ), Ժակ Ֆորին (Ֆրանսիա), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկին: Ինչպես հաղորդում է «Արմենպրես»-ը, այս մասին տեղեկացնում է Ադրբեջանի նախագահի պաշտոնական կայքը:
Հանդիպման ժամանակ կողմերը մտքեր են փոխանակել Լեռնային Ղարաբաղի հակամարտության ներկա դրության և դրա կարգավորման հեռանկարների վերաբերյալ:
ԵԱՀԿ Մինսկի խմբի համանախագահները Երեւան կժամանեն մայիսի 24-ին: Իգոր Պոպովին (Ռուսաստան), Յան Քելլիին (ԱՄՆ), Ժակ Ֆորին (Ֆրանսիա) կընդունի Հայաստանի Հանրապետության նախագահ Սերժ Սարգսյանը։ Հանդիպում է նախատեսվում նաև ՀՀ արտգործնախարար Էդվարդ Նալբանդյանի հետ։
ԵԱՀԿ Մինսկի խմբի համանախագահները վերջին անգամ Հայաստան են այցելել մարտի 21-ին։