Հալեպի որոշ շրջաններ մաքրվել են զինյալներից

ԵՐԵՎԱՆ, 12 ՀՈւՆՎԱՐԻ, ԱՐՄԵՆՊՐԵՍ: Սիրիայի զինված ուժերը բնակիչների հետ համագործակցության արդյունքում Հալեպ քաղաքի Օմայան մզկիթից մինչեւ Արդարադատության շենք ընկած տարածքում մեծ թվով զինյալների են սպանել: Նշված տարածքներում վերականգնվել է կայությունը:

Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, զինյալները փորձել են հարձակվել Հալեպի մոտակայքում գտնվող Քաշիշ օդանավակայանի վրա: Տեղի ունեցած բախումների ժամանակ զինված խմբավորման անդամները լուրջ կորուստներ են կրել:

Զինյալների թաքստոցներ են ոչնչացվել Համայի եւ Դարաայի գյուղերում, առգրավվել են զինյալներին պատկանող զենքերը:

Արաբական մեկ այլ աղբյուր տեղեկացնում է, որ օտարազգի զինյալները հունվարի 12-ին հայտնել են, որ Սիրիայում պայքարում են իսլամական պետություն ստեղծելու համար: Նրանք միացել են Ասադի հակառակորդներին, որպեսզի նրա հեռանալուց հետո հասնեն իրենց նպատակին:

Սիրիայում շուրջ 22 ամիս շարունակվող բախումների հետեւանքով զոհվել է մոտավորապես 40 հազար մարդ, այդ թվում չորս տասնյակից ավելի հայեր: