1 րոպեի ընթերցում
ԵՐԵՎԱՆ, 30 ՆՈՅԵՄԲԵՐԻ, ԱՐՄԵՆՊՐԵՍ: Սիրիայում հեռախոսակապը եւ համացանցը դեռեւս չեն գործում: Այս մասին «Արմենպրես»-ը տեղեկացավ հալեպահայերի ֆեյսբուքյան էջից: Ֆեյսբուքյան էջերում նաեւ նշվում է, որ Սուլեյմանիայում իրավիճակը հանդարտ է, սակայն ուժգին պայթյունների ձայներ են լսվում:
Համացանցում նաեւ տեսանյութ է տեղադրվել, որտեղ ռմբակոծվում է հայկական ծերանոցը եւ կարելի է տեսնել սեւ ծխով պատված ծերանոցի շենքը:
«Ալ Ջազիրա»-ն տեղեկացնում է, որ Դամասկոսի օդանավակայանն արդեն երկրորդ օրն է փակ է: Սիրիայի ազատ բանակը կառավարական ուժերին պատկանող երեք տանկեր է ոչնչացրել, զոհվել են տասնյակ զինծառայողներ:
Սիրիական պետական հեռուստատեսությունը հայտարարել է, որ օդանավակայանի ճանապարհն անվտանգ է եւ մաքրվել է զինված խմբավորումներից: Կայքը նաեւ տեղեկացնում է, որ թեպետ կառավարական ուժերը փորձում են օդանավակայանի շրջակայքում դիրքեր հաստատել, սակայն օդանավակայանը դեռեւս փակ է:
Նոյեմբերի 29-ին կայքի տեղեկացմամբ Սիրիայի տարածքում ավելի քան հարյուր մարդ է զոհվել: