Արման Մելիքյանը հավանական չի համարում, որ Լևոն Տեր-Պետրոսյանը կսատարի Գագիկ Ծառուկյանին
2 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Հավանական չէ, որ Լևոն Տեր-Պետրոսյանն առաջիկա նախագահական ընտրություններին սատարի Գագիկ Ծառուկյանին, քանի որ իրականում հարցն անձերի մեջ չէ: Այս մասին նոյեմբերի 21-ին հրավիրված մամուլի ասուլիսի ժամանակ ասաց ԼՂՀ ԱԳ նախկին նախարար Արման Մելիքյանը:
«Եթե նույնիսկ ՀԱԿ-ի, ՀՅԴ-ի ու ԲՀԿ-ի միջեւսկիզբ առած քաղաքական խորհրդակցությունների հետևանքով «ծնվի» միասնական թեկնածու, ապա նա չի կարող հաղթել, քանի որ քաղաքական ուժերը «կաթվածահար վիճակում են»: Այդ ուժերից յուրաքանչյուրը ցանկանում է իշխանությունից մասնաբաժին ունենալ»,- ասաց Արման Մելիքյանը:
Անդրադառնալով 100 տոկոս համամասնական ընտրակարգի անցնելու մասին վերջինքննարկումներին` Մելիքյանը շեշտեց, որ դա ժամանակ շահելու մի միջոց է:
«Կարող ենք ասել, որ Հայաստանում գնում է կուսակցությունների խոշորացման գործընթաց, որն ուղեկցվում է նաև «կուսակցական օլիգարխիայի» ձևավորմամբ»,-կարծիք հայտնեց նա` ընդգծելով, որհամամասնական ընտրակարգի անցնելը կնպաստի իր նշած «կուսակցական օլիգարխիա»-ի ստեղծմանը:
Խոսելով նախագահական ընտրությունների հավանական թեկնածուներից` Մելիքյանը շեշտեց, որ ինքը որևէ նորություն չի տեսնում և նորությունների ակնկալիք էլ չունի: