1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Լիբանանյան «Դիար» թերթը տեղեկացրել է, որ Սիրիայի նախագահ Բաշար ալ Ասադը հրաման է արձակել 30 հազար զինվորներ, 20 հազար զրահապատ մեքենաներ եւ տեխնիկա տեղափոխել Հալեպ քաղաք` Թուրքիայի սահմանի մոտակայքում զինյալների դեմ պայքարելու նպատակով: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, զինվորները Հալեպ պետք է տեղափոխվեն Համայից:
Թերթը տեղեկացնում է, որ քաղաքի երեք քառորդ մասում վերահսկողություն սահմանած սիրիական բանակն այժմ դժվարանում է պայքարել 18 հազարի հասնող զինյալների դեմ:
Ավելի վաղ տեղեկություններ էին ստացվել, որ Հալեպ են ուղեւորվելստորաբաժանումներԻդլեբից եւ Դեր Զորից:
Թերթը գրում է, որ բանակը նպատակադրվել է կարճ ժամանակում մաքրել բոլոր թաղամասերը զինյալներից` ավելացնելով, որ նախագահ Ասադը մեկնել է Հալեպ եւ ծանր պայքարի ականատես է եղել. քաղաքի արեւելյան մասում ընդդիմադիրներն են, իսկ արեւմտյան կողմում` կառավարական ուժերը:
Ընդդիմության ակտիվիստները տեղեկացնում են, որ 18 ամիս շարունակվող պայքարի ընթացքում զոհվել է ավելի քան 30 հազար մարդ: