1 րոպեի ընթերցում
ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: «Ոսկե ծիրան» երեւանյան միջազգային 9-րդ կինոփառատոնի շրջանակներում «Հայկական համայնապատկեր» ծրագրում լավագույնի կոչմանն արժանանալու համար ներկայացված է նաեւ ռեժիսոր Միքայել Վաթինյանի եւ պրոդյուսերԱրմինե Անդայի «Ժաննան եւ ձայները» ֆիլմը: Ինչպես «Արմենպրես»-ի հետ զրույցում նշեց Արմինե Անդան, հայաստանյան արտադրության լիամետրաժ խաղարկային ֆիլմը պատմում է Ժաննա անունով մի երիտասարդ կնոջ մասին, ով հանկարծակի, ռացիոնալ տեսանկյունից անհասկանալի մղումով, հետպատերազմյան անորոշության եւ տեսած երազի ազդեցությամբ հրաժարվում եւ հեռանում է ամեն ինչից` սկսելով թափառել երկրով մեկ: «Զրկելով ինքն իրեն կենսագրությունից եւ փաստորեն վերածվելով այլմոլորակայինի` նա կարծես նորից է կլանում աշխարհը` ի դեմս անծանոթ մարդկանց ու Հայաստանի հզոր բնության` լսելով նրանց ձայները»,-պատմեց Արմինե Անդան:
Ֆիլմը ոգեշնչված է Ժաննա Դ Արկի լեգենդից: «Ինձ ոգեւորել է նրա` փրկելու կարողությունը, որը պակասում է այսօրվա իրականությանը»,- ասաց նա: