Ըստ Արամ Ա. Կաթողիկոսի, քրիստոնյա-իսլամ գոյակցությունը Միջին Արեւելքի պատմության հիմքն է
1 րոպեի ընթերցում
ԱՆԹԻԼԻԱՍ, 2 ՕԳՈՍՏՈՍԻ, ԱՐՄԵՆՊՐԵՍ: Օգոստոսի 1-ին Բաղդադի եւ Մոսուլի քրիստոնեական, այդ թվում նաեւ հայկական եկեղեցիների դեմ տեղի ունեցած ահաբեկչական գործողությունների ու ռմբարհարության կապացությամբ իր մտահոգությունն է հայտնել նաեւ Մեծի Տանն Կիլիկիո Արամ Ա. կաթողիկոսը: Ինչպես հայտնում են Անթիլիասից, կաթողիկոսը վստահություն է հայտնել, որ Իրաքի պետությունը եւ Միջին Արեւելքի բոլոր պետություններն անհրաժեշտ բոլոր քայլերը պետք է ձեռնարկեն նման դատապարտելի արարքները կանխելու համար: Մրիջին Արեւելքի քրիստոնյա ու մահմեդական ժողովուրդը, որպես լիիրավ քաղաքացիներ՝ հավասար իրավունքներով ու պարտավորություններով, պետք է շարունակեն ապրել միասին` ամբողջական մասնակցություն ցուցաբերելով Միջին Արեւելքում արդարության վրա հիմնված խաղաղության հաստատմանը: «Դարերով միասին ապրած եւ նպատակների համար պայքարած ու նահատակված ժողովուրդների զավակները չեն կարող նման արարքներ գործել: Քրիստոնյա-իսլամ գոյակցությունը նաեւ Իրաքի անցյալի ու ներկայի անբաժան մասն է: Պատմության ընթացքում քաղաքական վայրիվերումների միջով անցած Միջին Արեւելքը միշտ պահել է իր յուրահատուկ նկարագիրը` որպես կրոների, մշակույթների եւ քաղաքակրթությունների երկխոսության միջավայրե,- ասել է Արամ Ա. կաթողիկոսը: