Արամ Ա կաթողիկոսը պաշտոնապես բացեց

Հարավային Կորեայի եկեղեցիների խորհրդի հիմնադրման 80-ամյակի առթիվ կազմակերպված համագումարը ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Արամ Ա կաթողիկոսը օգոստոսի 23-ին պաշտոնապես բացել Է Հարավային Կորեայի եկեղեցիների խորհրդի հիմնադրման 80- ամյակի կապակցությամբ կազմակերպված համագումարը, որին իրենց մասնակցությունն էին բերել աստվածաբաններ, պետական գործիչներ, Եկեղեցիների համաշխարհային խորհրդի գործադիր վարչության անդամներ, նաեւ Չինաստանի եկեղեցիները ներկայացնող պատվիրակությունը: Ինչպես հայտնեցին Մեծի Տանն Կիլիկիո կաթողիկոսության մամլո դիվանից, Արամ կաթողիկոսը, ողջունելով ներկաներին, ներկայացրել է էկումենիկ շարժման բնույթը եւ նպատակը: Նա միաժամանակ նկատել է, որ այն պետք է համադրել ժամանակին ու ներկա մարտահրավերներին: Նույն օրը գործադիր վարչության անդամները հանդիպել են Հյուսիսային եւ Հարավային Կորեաների երկխոսության պատասխանատու նախարարի հետ: Հանդիպման ընթացքում Արամ կաթողիկոսն իր զորակցությունն է հայտնել երկու Կորեաների վերամիավորման ուղղությամբ տարվող աշխատանքներին: