Վահան Տերյանի մասին ֆիլմի նկարահանումները Ռուսաստանում շարունակելու համար հատկացվել է 30 միլիոն դրամ
2 րոպեի ընթերցում
Հայ նշանավոր բանաստեղծ Վահան Տերյանի կյանքին ու գործունեությանը նվիրված խաղարկային-վավերագրական ֆիլմի նկարահանումները Ռուսաստանում շարունակելու համար հատկացվել է լրացուցիչ 30 միլիոն դրամ։
«Արմենպրես»-ի հաղորդմամբ՝ Կառավարությունը համապատասխան վերաբաշխումը հաստատել է նոյեմբերի 5-ի նիստում։
Ըստ ԿԳՄՍ նախարարության հիմնավորման՝ նկարահանումները նախատեսված են Մոսկվայում, Սանկտ Պետերբուրգում և Օրենբուրգում։
Ֆիլմի ստեղծման համար նախկինում արդեն տրամադրվել էր 25 միլիոն 972 հազար 500 դրամ։ Այդ միջոցներով իրականացվել են նախապատրաստական աշխատանքները և նկարահանումների մի մասը Հայաստանում ու Վրաստանում, այդ թվում՝ բանաստեղծի ծննդավայրում։
Ֆիլմն ընդգրկելու է Տերյանի կյանքի տարբեր ժամանակաշրջաններ, նշանակալի իրադարձություններ և հասարակական-քաղաքական գործունեության դրվագներ։ Նախատեսված է կիրառել նաև նոր տեխնոլոգիական գործիքներ։
Նախարարության ներկայացմամբ՝ նախաձեռնությունը նպատակ ունի լայնածավալ ստեղծագործության միջոցով պահպանել, արժևորել և սերունդներին փոխանցել բանաստեղծի ժառանգությունը։
Ֆիլմի հետարտադրական աշխատանքների ավարտն ու հանձնումը նախատեսված են 2027 թվականին։
Լրացուցիչ գումարն ուղղվել է ԿԳՄՍ նախարարության ընդհանուր հատկացումների շրջանակում վերաբաշխմամբ՝ «Կինեմատոգրաֆիայի ծրագրի» դրամագլխի ձևավորման միջոցառումից դեպի մշակութային միջոցառումների իրականացում։