Եգիպտոսի և Իրանի ԱԳ նախարարները քննարկել են տարածաշրջանային զարգացումները և լարվածության թուլացման ուղիները
2 րոպեի ընթերցում
Եգիպտոսի արտաքին գործերի և միջազգային համագործակցության նախարար դոկտոր Բադր Աբդ ալ-Ատտին հոկտեմբերի 13-ին հեռախոսազրույց է ունեցել Իրանի Իսլամական Հանրապետության արտաքին գործերի նախարար Աբբաս Արաղչիի հետ։ «Արմենպրես»-ի փոխանցմամբ՝ այս մասին հաղորդագրություն է տարածել Եգիպտոսի արտաքին գործերի նախարարությունը։
Հեռախոսազրույցի ընթացքում քննարկվել են տարածաշրջանում տիրող իրավիճակը և տեղի ունեցող արագ զարգացումները, ինչպես նաև լարվածության թուլացման և ներկայիս սրացման զսպման ուղղությամբ ձեռնարկվող ջանքերը։
Նախարարության պաշտոնական խոսնակ, դեսպան Նադիր Զաքին հայտարարել է, որ նախարար ալ-Ատտին հեռախոսազրույցի ընթացքում ընդգծել է Սաուդյան Արաբիայի Թագավորության տարածքի դեմ ուղղված բոլոր հարձակումների անհապաղ դադարեցման անհրաժեշտությունը՝ ընդգծելով, որ այդ հարձակումների համար արդարացում չկա, և որ դրանք անընդունելի են։
Նա ընդգծել է տարածաշրջանային լարվածության թուլացման և զսպման կարևորությունը՝ հաշվի առնելով դրանց բացասական հետևանքները տարածաշրջանի և աշխարհի բոլոր երկրների անվտանգության և կայունության վրա։
Նախարարը նաև ընդգծել է քաղաքական և դիվանագիտական լուծումներին առաջնահերթություն տալու և Իրանի ու Միացյալ Նահանգների միջև բանակցությունների ու երկխոսության ուղուն վերադառնալու կարևորությունը՝ որպես առկա վեճերը լուծելու և տարածաշրջանը հետագա սրացման ու անկայունության մեջ ընկղմվելու ռիսկերից զերծ պահելու միակ միջոց։