Ռուբիոն ու Բայրամովը քննարկել են Հայաստան–Ադրբեջան հարաբերությունների կարգավորումը

ԱՄՆ պետքարտուղար Մարկո Ռուբիոն և Ադրբեջանի արտաքին գործերի նախարար Ջեյհուն Բայրամովը հոկտեմբերի 5-ին հեռախոսազրույց են ունեցել՝ քննարկելով Հայաստան–Ադրբեջան հարաբերությունների կարգավորման գործընթացն ու ԱՄՆ–Ադրբեջան ռազմավարական գործընկերությունը։ «Արմենպրես»-ի հաղորդմամբ՝ այս մասին տեղեկացնում է APA գործակալությունը՝ հղում անելով Ադրբեջանի ԱԳՆ-ին։ 

Ըստ ադրբեջանական կողմի՝ զրուցակիցներն անդրադարձել են 2025 թվականի օգոստոսի 8-ին Վաշինգտոնում կայացած գագաթնաժողովից հետո երկկողմ ռազմավարական գործընկերության զարգացման ուղղությամբ արձանագրված առաջընթացին։ 

Ադրբեջանի ԱԳՆ-ի հաղորդմամբ՝ Բայրամովը Ռուբիոյին ներկայացրել է խաղաղության օրակարգի առաջմղման, վստահության ձևավորման և տարածաշրջանային կայունության ամրապնդման ուղղությամբ Ադրբեջանի քայլերը։ Կողմերը մտքեր են փոխանակել նաև փոխադարձ հետաքրքրություն ներկայացնող այլ հարցերի շուրջ։