Երիտասարդական քաղաքականությունը կառավարության գործունեության առաջնահերթ ուղղություններից է. Ժաննա Անդրեասյան
2 րոպեի ընթերցում
Երիտասարդական քաղաքականությունը կառավարության գործունեության առաջնահերթ ուղղություններից է։ «Արմենպրես»-ի հաղորդմամբ՝ այս մասին ԿԳՄՍ նախարարին կից հասարակական խորհրդի հերթական նիստի ընթացքում ասաց ԿԳՄՍ նախարար Ժաննա Անդրեասյանը։
«Կառավարության գործունեության նոր ծրագրում երիտասարդական քաղաքականությունն ունի իր առանձնահատուկ ներկայացվածությունը, և դրան ուղղված են մի շարք կարևոր ծրագրեր։ Հետևաբար մեզ համար շատ կարևոր է հասկանալ, թե ինչպես աշխատել տարբեր ակտիվ երիտասարդների հետ և ինչպես ակտիվացնել այն երիտասարդներին, որոնք ունեն գաղափարներ, սակայն գուցե չունեն անհրաժեշտ պայմաններն ու միջավայրը՝ իրենց գաղափարներն իրագործելու համար»,- ասաց նախարարը։
Նրա խոսքով՝ կառավարության ծրագրում կարևոր շեշտադրում է արվում նաև սոցիալական շփումների հարթակների ձևավորմանը։
«Մեր այն քաղաքականությունը, որն ուղղված է տարբեր բնակավայրերում երիտասարդական կենտրոնների ձևավորմանը, գալիս է ապահովելու նաև նման շփման հնարավորությունների ձևավորումը»,- նշեց Անդրեասյանը։
Նախարարի խոսքով՝ կարևոր անելիքներից է երիտասարդներին համապատասխան գիտելիքների, հմտությունների, խորհրդատվության և մենթորության տրամադրումը։ «Ամենակարևոր անելիքներից մեկը մեր երիտասարդներին համապատասխան գիտելիքների, հմտությունների, խորհրդատվության, մենթորության տրամադրումն է, որպեսզի այդ հմտությունները ձևավորվեն, և նրանք կարողանան անհրաժեշտ կարողություններով հանդես գալ, ինչը նրանց ինքնաբավ կդարձնի»,- հավելեց նա։