Վարդենիսի համայնքապետն ընդունել է Էստոնիայի Հանրապետության Վալգամա մասնագիտական կրթության կենտրոնի պատվիրակությանը
2 րոպեի ընթերցում
Վարդենիս համայնքի ղեկավար Ահարոն Խաչատրյանն ընդունել է «Բադեյան» պետական քոլեջի հետ միջազգային համագործակցության շրջանակում Վարդենիս ժամանած Էստոնիայի Վալգամա մասնագիտական կրթության կենտրոնի պատվիրակությանը՝ կենտրոնի տնօրեն Մարգուս Օխաուտսի գլխավորությամբ։
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, հանդիպման ընթացքում քննարկվել են մասնագիտական կրթության ոլորտում համագործակցության զարգացման, փորձի փոխանակման, համատեղ նախաձեռնությունների իրականացման և հետագա համագործակցության նոր հնարավորությունների վերաբերյալ հարցեր։
Հատկապես կարևորվել է Վարդենիսի «Բադեյան» պետական քոլեջի և Վալգամա մասնագիտական կրթության կենտրոնի միջև ձևավորված գործընկերությունը՝ որպես մասնագիտական կրթության որակի բարելավման, կառավարման արդյունավետության բարձրացման և միջազգային լավագույն փորձի փոխանակման կարևոր հարթակ։
«Վալգամա մասնագիտական կրթության կենտրոնի պատվիրակության այցը հնարավորություն է Վարդենիս համայնքը միջազգային գործընկերներին ներկայացնելու, համայնքի և մասնագիտական կրթության զարգացման ուղղությամբ նոր կապեր հաստատելու և ապագա համատեղ ծրագրերի հիմքերն ամրապնդելու համար»,-ներկայացրին Վարդենիսի համայնքապետարանի աշխատակազմից։
Հանդիպման ընթացքում Վարդենիսի «Բադեյան» պետական քոլեջի տնօրեն Ա. Սիրադեղյանը շնորհակալություն հայտնեց համայնքի ղեկավար Ահարոն Խաչատրյանին՝ պատվիրակության և քոլեջի ներկայացուցիչների ջերմ ու հյուրընկալ ընդունելության, ինչպես նաև միջազգային համագործակցությանն ու քոլեջների միջև կապերի ամրապնդմանն աջակցելու պատրաստակամության համար։