2 րոպեի ընթերցում
Ռուսաստանի և Իրանի միջև հարաբերությունները կայուն զարգանում են բոլոր ոլորտներում, հայտարարել է Ռուսաստանի նախագահ Վլադիմիր Պուտինը Բիշքեկում Շանհայի համագործակցության կազմակերպության (ՇՀԿ) գագաթնաժողովի շրջանակում Իրանի նախագահ Մասուդ Փեզեշքիանի հետ հանդիպման ժամանակ։
«Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը։
«Ինչպես գիտեք, մենք օգտագործում ենք յուրաքանչյուր հնարավորություն հանդիպելու, շփվելու և խորհրդակցելու համար։ Ռուս-իրանական բարեկամական հարաբերությունները կայուն զարգանում են բոլոր ուղղություններով ՝ համաձայն Համապարփակ ռազմավարական գործընկերության պայմանագրի տառին և ոգուն», - ասել է ՌԴ նախագահը։
Նա նշել է, որ Ռուսաստանը հիացած է իրանցի ժողովրդի քաջությամբ ու տոկունությամբ՝ իր ազգային շահերը պաշտպանելու գործում։
Պուտինը հավելել է, որ Ռուսաստանը և Իրանը պահպանում են առևտրատնտեսական հարաբերությունների դինամիկան՝ չնայած Իսլամական Հանրապետությունում ռազմաքաղաքական իրավիճակին։ Նա նաև նշել է, որ Ռուսաստանը մեծ նշանակություն է տալիս Իսլամական Հանրապետության հետ հումանիտար ոլորտում համագործակցության ընդլայնմանը։
Փեզեշքիանն իր հերթին հայտարարել է, որ Իրանի և Ռուսաստանի հարաբերությունները ռազմավարական են, և դա օգնում է Իսլամական Հանրապետությանը դիմադրել Միացյալ Նահանգներին։
«Մեր հարաբերությունները ռազմավարական են…. Մենք վստահ ենք, որ այս կերպ կարող ենք դիմադրել ԱՄՆ-ին և նրանց կողմից մեր դեմ կիրառվող բոլոր պատժամիջոցներին», - ասել է նա։
Իրանի նախագահը նաև շնորհակալություն է հայտնել Ռուսաստանի նախագահին ԱՄՆ-ի հետ հակամարտության ընթացքում Իսլամական Հանրապետությանը ցուցաբերած աջակցության համար։