Իրինա Յոլյանը չընտրվեց ԱԺ տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի պաշտոնում
1 րոպեի ընթերցում
Հայաստանի Հանրապետության ազգային ժողովի պատգամավորների գաղտնի քվեարկության արդյունքներով Իրինա Յոլյանը չընտրվեց ԱԺ տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի պաշտոնում։
«Արմենպրես»-ի հաղորդմամբ՝ նրա թեկնածությունն առաջադրել էր «Ուժեղ Հայաստան» խմբակցությունը։
Հաշվիչ հանձնաժողովի նախագահ Լիլիթ Մինասյանը ներկայացրեց քվեարկության արդյունքները։
«Քվեարկությանը մասնակցել է 102 պատգամավոր, անվավեր է ճանաչվել 1 քվեաթերթիկ։ Ձայները բաշխվել են հետևյալ կերպ՝ կողմ՝ 38, դեմ՝ 63 պատգամավոր»,-ասաց Մինասյանը։
Ընդդիմադիր «Ուժեղ Հայաստան» խմբակցության ընտրած մշտական հանձնաժողովներից երեքում՝ Ֆինանսավարկային և բյուջետային հարցերի, Եվրոպական ինտեգրման և Տարածքային կառավարման և շրջակա միջավայրի պահպանության հարցերի մշտական հանձնաժողովների նախագահների թեկնածուներն առաջին փորձից չէին հավաքել բավարար ձայներ։
Նշենք, որ առաջին փորձից Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի պաշտոնում խմբակցությունն առաջադրել էր Դավիթ Ղազինյանի թեկնածությունը, որի թեկնածությանը կողմ էր քվեարկել 40 պատգամավոր, դեմ՝ 62 պատգամավոր։