3 րոպեի ընթերցում
Ռուսաստանի նախագահի մամուլի խոսնակ Դմիտրի Պեսկովը հայտարարել է, որ Հայաստանը կարող է դուրս գալ Հավաքական անվտանգության պայմանագրի կազմակերպությունից, եթե անդամակցությունն այլևս պետք չէ Երևանին։
«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ վկայակոչելով Պեսկովի հայտարարությունը։
ՌԴ նախագահի խոսնակն այս կերպ արձագանքել է Հայաստանի Հանրապետության վարչապետ Նիկոլ Փաշինյանի՝ Ազգային ժողովում կառավարության 2026-2031 թվականների ծրագրի քննարկման ընթացքում արված հայտարարություններին։
Նշենք, որ վարչապետ Փաշինյանը վստահեցրել էր, որ Հայաստանը չի ակտիվացնելու աշխատանքերը ՀԱՊԿ-ում, և կառույցի նկատմամբ Երևանի հետաքրքրությունը սպառված է, և ինքն ուրախ կլինի, եթե Հայաստանին հեռացնեն կազմակերպությունից։
«Եթե Երևանը այլևս կարիք չունի անդամակցել այդքան կարևոր տարածաշրջանային անվտանգության կազմակերպությանը՝ ելնելով իր ազգային շահերից, ապա այն ազատ է համապատասխան որոշում կայացնել և դուրս գալ»,-ասել է Պեսկովը։
Նա հավելել է, որ մինչ օրս Մոսկվան լսել է Հայաստանի ներկայացուցիչների տարբեր մակարդակների հայտարարություններ այն մասին, որ, այո, անդամակցությունը սառեցված է, բայց Հայաստանը առայժմ դուրս գալու ծրագրեր չունի։
Կրեմլի խոսնակն անդրադարձել է նաև վարչապետ Փաշինյանի այն հայտարարութանը, որ Հայաստանի կառավարությունն առաջիկայում Եվրամիության անդամակցելու պաշտոնական դիմում ներկայացնելու գործընթաց կսկսի։
«Այստեղ կա մի շատ կարևոր ասպեկտ, որը մեր ներկայացուցիչները, և հատկապես մեր պետության ղեկավարը, նույնպես քննարկել են։ ԵՄ անդամակցության դիմում ներկայացնելուց հետո Հայաստանը պետք է սկսի իր օրենսդրությունը լայն շրջանակի ոլորտներում՝ առևտուր, բուսասանիտարիա, մաքսային և այլն, համապատասխանեցնելու գործընթացը Եվրամիության չափանիշներին։ Այս չափանիշները հակասում են մեր երկրում ընդունվածներին և ԵԱՏՄ-ում ընդունվածներին։ Եվ հենց այստեղ է, որ մենք կհանդիպենք խորը հակասությունների, որոնք առաջին հերթին կվնասեն հենց Հայաստանին»,- ասել է Կրեմլի ներկայացուցիչը։
Նա Հայաստանին խորհուրդ է տվել ԵՄ անդամակցությանը դիմելիս՝ հիշել տարբեր երկրների, մասնավորապես Թուրքիայի փորձը։