Ռուբիոն ԱՄԷ պաշտոնակցի հետ քննարկել է Իրանի և Հորմուզի նեղուցում նավագնացության ազատության հարցերը
2 րոպեի ընթերցում
ԱՄՆ պետքարտուղար և նախագահի ազգային անվտանգության հարցերով խորհրդական Մարկո Ռուբիոն և Արաբական Միացյալ Էմիրությունների (ԱՄԷ) նախագահի ազգային անվտանգության հարցերով խորհրդական շեյխ Թահնուն բին Զայիդ Ալ Նահյանը հեռախոսազրույցի ընթացքում քննարկել են Իրանի և Հորմուզի նեղուցում նավագնացության շուրջ ստեղծված իրավիճակը:
«Արմենպրես»-ի փոխանցմամբ՝ այս մասին ասվում է Պետքարտուղարության մամուլի ծառայության ղեկավար Թոմի Փիգոթի տարածած հաղորդագրության մեջ:
«Կողմերը քննարկել են տարածաշրջանային անվտանգությանն առնչվող մի շարք հարցեր, այդ թվում՝ իրադրությունը Լիբանանում, ինչպես նաև ԱՄՆ-ի և ԱՄԷ-ի գործողությունների հետագա համակարգումը՝ Իրանին և տարածաշրջանում նրա ահաբեկչական պրոքսիներին շարունակական հարձակումների համար պատասխանատվության ենթարկելու նպատակով», - նշված է հաղորդագրության մեջ:
Բացի այդ նշվում է, որ Ռուբիոն ընդգծել է Հորմուզի նեղուցով նավագնացության ազատության կարևորությունը:
Օգոստոսի 17-ին Reuters գործակալությունը հաղորդել է, որ Հորմուզի նեղուցով փոխադրումների ծավալը հանգստյան օրերին կրճատվել է մինչև նվազագույնը՝ Աբու Դաբիի ազգային նավթային ընկերության (ADNOC) երեք նավի վրա Հորմուզի նեղուցում հարձակումների մասին հաղորդագրություններից հետո: