2 րոպեի ընթերցում
Աբու Դաբիի ազգային նավթային ընկերությունը (ADNOC) հայտարարել է, որ իր երկու նավերը օգոստոսի 13-ի երեկոյան հարձակման են ենթարկվել Հորմուզի նեղուցով անցնելիս։ «Արմենպրես»-ի փոխանցմամբ՝ այս մասին հաղորդում է էմիրաթական WAM գործակալությունը։
«Միջադեպի հետևանքով տուժածներ չկան, և իրավիճակը վերահսկողության տակ է», - նշվել է ընկերության հայտարարության մեջ։
Հայտարարության մեջ ADNOC-ը շեշտել է ծովագնացների անվտանգության և բարեկեցության պաշտպանության կարևորությունը՝ միաժամանակ պահպանելով նավագնացության ազատությունը և ծովային անվտանգությունը։
ԱՄԷ արտաքին գործերի նախարարությունը խստորեն դատապարտել է Իրանի հարձակումը։
Հայտարարության մեջ նախարարությունն ընդգծել է, որ այս հարձակումը ՄԱԿ-ի Անվտանգության խորհրդի 2817 բանաձևի կոպիտ խախտում է, որը հաստատում է նավագնացության ազատության կարևորությունը և մերժում առևտրային նավերի թիրախավորումը կամ միջազգային ծովային ուղիների խափանումը։ Գերատեսչությունը շեշտել է, որ առևտրային նավագնացության թիրախավորումը և Հորմուզի նեղուցի օգտագործումը՝ որպես տնտեսական հարկադրանքի կամ շանտաժի գործիք, ներկայացնում է Իրանի Իսլամական հեղափոխության պահապանների կորպուսի (ԻՀՊԿ) կողմից ծովահենության գործողություններ և անմիջական սպառնալիք է տարածաշրջանի կայունությանը, նրա ժողովուրդներին և համաշխարհային էներգետիկ անվտանգությանը։
Իրանի արտաքին գործերի նախարարությունը կամ ԻՀՊԿ-ն դեռևս չեն մեկնաբանել միջադեպը։
Սա ADNOC-ի նավերի հետ կապված երկրորդ նմանատիպ միջադեպն է վերջին օրերի ընթացքում։
Փետրվարի 28-ին ԱՄՆ-ի և Իսրայելի կողմից Իրանի դեմ մեկնարկած պատերազմից առաջ աշխարհում նավթի և հեղուկ բնական գազի մոտ մեկ հինգերորդն անցնում էր Օմանի և Իրանի միջև գտնվող Հորմուզի նեղուցով: Ի պատասխան ռազմական գործողությունների՝ Իրանը փակել է ջրային ճանապարհը։
ԻՀՊԿ-ն սպառնացել է միջոցներ ձեռնարկել նեղուցով անցնող նավերի դեմ, եթե դրանք կապված լինեն Թեհրանի հակառակորդների հետ կամ չկատարեն Իրանի հրահանգները։
ԱՄՆ-ն իր հերթին շրջափակել է Իրանի նավահանգիստները։