2 րոպեի ընթերցում
Եմենի «Անսար Ալլահ» շարժման հութիները հայտնել են նավերի վրա հարձակումներ իրականացնելու մասին։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Հարձակումները տեղի են ունեցել Բաբ էլ-Մանդեբի նեղուց տանող Օմանի ծոցում և Կարմիր ծովի մուտքի մոտ, որոնք երկուսն էլ կարևորագույն օղակներ են համաշխարհային նավթի մատակարարման համար։
Եմենի տրանսպորտի նախարարությունը հայտնել է, որ Կարմիր ծովի հարավային հատվածում գտնվող Բաբ էլ-Մանդեբ նեղուցում եգիպտական «Թիհամահ» փոքր բեռնատար նավի վրա հութիների ենթադրյալ հարձակման հետևանքով զոհվել է անձնակազմի չորս անդամ: Եմենի ափամերձ պահպանության ծառայությունը հայտնել է, որ զոհվել է նաև հակահութիական ռազմական խմբավորման երկու եմենցի փրկարար։
Ավելի ուշ հութիները հայտարարել են, որ Բաբ էլ-Մանդեբի նեղուցում հարձակվել են ռազմական տեխնիկա տեղափոխող սաուդական նավի վրա, սակայն չեն նշել նավի անունը։
Մյուս կողմից, ԱՄՆ զինված ուժերը հայտնել է, որ ԱՄՆ ռազմածովային ուժերի MH-60 ուղղաթիռը երկու Hellfire հրթիռ է արձակել Պանամայի դրոշի ներքո նավարկող բեռնատար նավի վրա։
ԱՄՆ կենտրոնական հրամանատարությունը (CENTCOM) հայտնել է, որ նավն անտեսել է Իրանի նավահանգիստների նկատմամբ ծովային շրջափակման խախտումը դադարեցնելու վերաբերյալ բազմաթիվ նախազգուշացումները։
CENTCOM-ը նաև նշել է, որ օգոստոսի 11-ի դրությամբ վերաուղղորդել է 55 նավ, որոնք փորձել են խախտել Իրանի ծովային շրջափակումը, նաև բարձրացել է 2 նավի տախտակամածին։