2 րոպեի ընթերցում
Ուկրաինական կողմը չի համոզել Թեհրանին, որ Կասպից ծովում իրանական առևտրային նավին հասցված հարվածը կանխամտածված չի եղել, հայտարարել է Իրանի ԱԳՆ պաշտոնական ներկայացուցիչ Էսմայիլ Բաղային: «Արմենպրես»-ի փոխանցմամբ՝ այս մասին հաղորդում է «ՌԻԱ Նովոստի» գործակալությունը։
«Մենք շատ հստակ արտահայտել ենք մեր դիրքորոշումը։ Մեզ չի համոզել ուկրաինական կողմի այն հայտարարությունը, թե սա (խմբ.՝ իրանական առևտրային նավին հասցված հարվածը) կանխամտածված չի եղել», - ասել է նա ճեպազրույցի ժամանակ։
Բաղային հավելել է, որ Ուկրաինան պետք է փոխհատուցի վնասը։
Ավելի վաղ Իրանի արտգործնախարարությունը հայտնել էր, որ Ուկրաինան հուլիսի 25-ին հարձակում է կատարել իրանական առևտրային նավի վրա։ Գրոհի հետևանքով զոհվել է մեկ նավաստի, մի քանիսը վիրավորվել են։
Թեհրանը խոստացել էր անպատասխան չթողնել հարձակումը։
Հուլիսի 29-ին Իրանի և Ուկրաինայի արտգործնախարարները թեմայի շուրջ հեռախոսազրույց են ունեցել, որի ընթացքում Անդրեյ Սիբիհան Աբբաս Արաղչիին վստահեցրել էր, որ հարվածը միտումնավոր չի եղել։