360.34
Բաղային հայտնել է, որ ԱԷՄԳ-ի պաշտոնյաները վերջերս ստուգայց են կատարել Բուշեհրի ատոմակայանում
2 րոպեի ընթերցում
Իրանի արտաքին գործերի նախարարության խոսնակ Էսմայիլ Բաղային նոյեմբերի 9-ի մամուլի ասուլիսում նշել է, որ Իրանը չի կասեցրել իր միջուկային պարտավորությունները, սակայն ԱՄՆ-ի և Իսրայելի կողմից իր օբյեկտների վրա իրականացված հարձակումները «խոչընդոտել են երաշխիքային մեխանիզմների բնականոն իրականացմանը»։ «Արմենպրես»-ի փոխանցմամբ՝ այս մասին հայտնում է Mehr գործակալությունը։
Բաղայիի խոսքով՝ որպես Միջուկային զենքի չտարածման մասին պայմանագրի կողմ՝ Իրանը «մշտապես ցուցադրել է իր հավատարմությունը Երաշխիքների մասին համաձայնագրին»՝ հավելելով, որ այժմ «ագրեսոր կողմերը պետք է պատասխանատվություն կրեն այս գործընթացը խաթարելու համար, քանի որ ներկայիս ոչ նորմալ պայմաններում համագործակցությունը չի կարող շարունակվել այնպես, ինչպես նախկինում»։
«Ատոմային էներգիայի միջազգային գործակալության (ԱԷՄԳ) Կառավարիչների խորհուրդը և Գլխավոր տնօրենը չեն կատարել իրենց իրավական պարտավորությունները՝ որդեգրելով դիրքորոշումներ, որոնք անտեսում են Իրանի օբյեկտների դեմ իրականացված ագրեսիայի հետ կապված մեղավորությունն ու ապօրինի գործողությունները», - շեշտել է նա։
Բաղային նշել է, որ Վիեննայում Իրանի առաքելության և գործակալության միջև մասնագիտական շփումները շարունակվում են. դրա վկայությունն է Բուշեհրի ատոմակայանում մի քանի օր առաջ իրականացված ստուգայցը։
Բաժանորդագրվեք մեր ալիքին Telegram-ում