Բաքվի վերաքննիչ դատարանն անփոփոխ է թողել ապօրինի պահվող հայ գերիների վերաբերյալ դատավճիռները

Բաքվի վերաքննիչ դատարանն անփոփոխ է թողել Լեռնային Ղարաբաղի նախկին ռազմաքաղաքական ղեկավարների և ապօրինի կերպով Բաքվում պահվող մյուս հայերի վերաբերյալ դեռևս փետրվարի 5-ին կայացրած դատավճիռները։

«Արմենպրես»-ի հաղորդմամբ՝ այս մասին հայտնում է ադրբեջանական APA գործակալությունը՝ նշելով, որ Բաքվի վերաքննիչ դատարանում այսօր շարունակվել է Ադրբեջանում դատապարտված հայերի բողոքների քննությունը։

Հիշեցնենք, որ 2026 թվականի փետրվարի 5-ին Բաքվի դատարանը կեղծ մեղադրանքներով ազատազրկման է դատապարտել հայ գերիներին։ Ադրբեջանական դատարանը ցմահ ազատազրկման է դատապարտել ԼՂ  նախկին նախագահ Արայիկ Հարությունյանին, պաշտպանության բանակի նախկին հրամանատար Լևոն Մնացականյանին, պաշտպանության բանակի հրամանատարի նախկին տեղակալ Դավիթ Մանուկյանին, ԼՂ խորհրդարանի նախկին խոսնակ Դավիթ Իշխանյանին և ԱԳՆ նախկին նախարար Դավիթ Բաբայանին։ ԼՂ նախկին նախագահներ Արկադի Ղուկասյանն ու Բակո Սահակյանը դատապարտվել են 20 տարվա ազատազրկման։

Ապօրինի պահվող մյուս անձինք՝ Մադաթ Բաբայանը, Մելիքսեթ Փաշայանը, Գարիկ Մարտիրոսյանը, Դավիթ Ալլահվերդյանը, Լևոն Բալայանը, Վասիլի Բեգլարյանը, Գուրգեն Ստեփանյանը և Էրիկ Ղազարյանը դատապարտվել են 15-ից մինչև 19 տարվա ազատազրկման։

Նշենք, որ ԼՂ-ի նախկին պետնախարար Ռուբեն Վարդանյանի դեմ հարուցված շինծու քրեական գործը քննվում էր առանձնացված վարույթով։ Փետրվարի 17-ին հայտնի դարձավ, որ Բաքվի դատարանը Ռուբեն Վարդանյանին 20 տարվա ազատազրկման է դատապարտել: