Պուտինը Ռուսաստանի տնտեսությունը կայուն է անվանել՝ չնայած վառելիքային ճգնաժամին

Ռուսաստանի տնտեսությունը և դրա հիմնական ոլորտները կայուն են՝ չնայած վառելիքաէներգետիկ ոլորտն ապակայունացնելու փորձերին, և վառելիքի շուկայում առկա դժվարությունները ժամանակավոր են։ «Արմենպրես»-ի փոխանցմամբ՝ այս մասին տնտեսական հարցերով խորհրդակցության ժամանակ հայտարարել է Ռուսաստանի նախագահ Վլադիմիր Պուտինը։

«Մեր խորհրդակցության հենց սկզբում ես կնշեմ, որ ներքին տնտեսության, տնտեսության ոլորտների, դրա հիմնական ոլորտների վիճակը կայուն է՝ չնայած վառելիքաէներգետիկ համալիրում և որոշ այլ ոլորտներում իրավիճակն ապակայունացնելու արտաքին փորձերին», - Պուտինի խոսքերն է մեջբերում «Ինտերֆաքս» գործակալությունը։

«Միևնույն ժամանակ, ես ցանկանում եմ ևս մեկ անգամ ընդգծել, որ վառելիքի շուկայում մեր ունեցած դժվարություններն, անշուշտ, ժամանակավոր են և ի վիճակի չեն ազդել ընդհանուր տնտեսական դինամիկայի վրա», - հավելել է ՌԴ նախագահը։

Նա տեղեկացրել է, որ ըստ Տնտեսական զարգացման նախարարության՝ «Ռուսաստանի ՀՆԱ-ն մայիսին համեստ աճ է գրանցել, սակայն ամեն դեպքում աճել է և գտնվում է 0,3% դրական գոտում, իսկ ընդհանուր առմամբ, այս տարվա առաջին հինգ ամսվա ընթացքում աճը կազմել է 0,2%։

«Այստեղ հիմնական գործոններից մեկն, իհարկե, ներքին պահանջարկն է՝ կառավարության, բիզնեսի և քաղաքացիների կողմից», - ասել է ՌԴ նախագահը։