Ջայշանկարը Լավրովի հետ հանդիպմանը բարձրացրել է հնդիկ նավաստիների անվտանգության հարցը՝ ռուս-ուկրաինական հակամարտության ֆոնին

Հնդկաստանի արտաքին գործերի նախարար Սուբրամանյամ Ջայշանկարը Մանիլայում հանդիպել է իր ռուս գործընկեր Սերգեյ Լավրովի հետ Հարավարևելյան Ասիայի պետությունների ասոցիացիայի (ԱՍԵԱՆ) միջոցառումների շրջանակում:

«Արմենպրես»-ի փոխանցմամբ՝ Ջայշանկարն X-ում գրել է, որ Լավրովի հետ հանգամանորեն քննարկել են երկկողմ հարաբերությունները։

An in-depth review of our bilateral relations with FM Sergey Lavrov of Russia.

Reiterated our strong concern regarding the safety of Indian seafarers in the region. Discussed various aspects of our partnership, including trade & investment, energy & connectivity, science &… pic.twitter.com/hjswnKidfP

— Dr. S. Jaishankar (@DrSJaishankar) July 22, 2026

Հնդկաստանի ԱԳ նախարարը նաև մտահոգություն է հայտնել ռուս-ուկրաինական հակամարտության ֆոնին հնդիկ նավաստիների անվտանգության առնչությամբ։

«Վերահաստատեցինք մեր խորը մտահոգությունը տարածաշրջանում հնդիկ նավաստիների անվտանգության վերաբերյալ։ Քննարկեցինք մեր գործընկերության տարբեր ասպեկտներ, այդ թվում՝ առևտուրը և ներդրումները, էներգետիկան և կապը, գիտությունը և տեխնոլոգիաները, ինչպես նաև շարժունակությունը։ Նաև մտքեր փոխանակեցինք Ուկրաինայի հակամարտության և Պարսից ծոցի իրավիճակի վերաբերյալ», - նշել է Ջայշանկարը:

Ավելի վաղ Ուկրաինայի իշխանությունները հայտնել էին, որ Ռուսաստանը հուլիսի 19-ին երեք թևավոր հրթիռ է արձակել Գվինեա-Բիսաուի դրոշով նավարկող Golden Leo նավի վրա, որի տախտակամածին գտնվում էին հնդիկ և սիրիացի անձնակազմի անդամներ։ Հարվածների հետևանքով զոհվել է 10 մարդ, այդ թվում՝ Հնդկաստանի 4 քաղաքացի։

Այս առնչությամբ Ռուսաստանի գործերի ժամանակավոր հավատարմատարը կանչվել է Հնդկաստանի ԱԳՆ։