2 րոպեի ընթերցում
Լիբանանի առողջապահության նախարարությունը հայտարարել է, որ երկրում իսրայելական ագրեսիայի հետևանքով զոհերի թիվը հասել է 4320-ի։ «Արմենպրես»-ի փոխանցմամբ՝ այս մասին հաղորդում է Լիբանանի Ազգային լրատվական գործակալությունը (NNA):
«Ռազմական էսկալացիայի սկսվելուց ի վեր՝ մարտի 2-ից մինչև հուլիսի 7-ն ընկած ժամանակահատվածում, զոհերի ընդհանուր թիվը հասել է 4320-ի, իսկ վիրավորներինը՝ 12 203-ի», - նշված է նախարարության հաղորդագրության մեջ։
Գործակալությունը տեղեկացնում է, որ իսրայելական ռազմական ինքնաթիռները շարունակում են թիրախավորել երկրի հարավում գտնվող Նաբաթիե շրջանը։
Տեղեկություններ են հաղորդվում նաև, որ Բեյրութի հարավային արվարձանների վրայով իսրայելական անօդաչու թռչող սարքեր են թռչում։
Լիբանանը ներքաշվել է Մերձավոր Արևելքի հակամարտության մեջ այն բանից հետո, երբ «Հեզբոլլահ»-ն, ի պատասխան Իրանի դեմ ամերիկա-իսրայելական հարվածների, մարտի 2-ից հարձակումներ էր սկսել Իսրայելի դեմ։
Իսրայելը, Լիբանանը և ԱՄՆ-ն հունիսի 26-ին Վաշինգտոնում եռակողմ շրջանակային համաձայնագիր են ստորագրել «Հեզբոլլահ» շարժման և հրեական պետության միջև մարտերը դադարեցնելու շուրջ: