Մոդին Փեզեշքիանի հետ զրույցում վերահաստատել է Հորմուզի նեղուցում նավարկության ազատության կարևորությունը

Հնդկաստանի վարչապետ Նարենդրա Մոդին հեռախոսազրույց է ունեցել Իրանի նախագահ Մասուդ Փեզեշքիանի հետ՝ քննարկելով Մերձավոր Արևելքի «վերջին զարգացումները»։

Ինչպես հաղորդում է «Արմենպրես»-ը, X-ի իր էջում արված գրառման մեջ Մոդին նշել է, որ «ողջունել է բանակցություններում գրանցված առաջընթացը» և «վերահաստատել է Հորմուզի նեղուցում նավարկության ազատության կարևորությունը՝ ինչպես Հնդկաստանի, այնպես էլ ամբողջ աշխարհի համար»։

Հնդկաստանը մեծապես կախված է Պարսից ծոցի տարածաշրջանից ներմուծվող նավթից և գազից։ Մինչ ԱՄՆ-ի և Իսրայելի կողմից Իրանի հետ հակամարտության սրացումը, Հնդկաստանի հում նավթի մոտ 45%-ը, հեղուկացված բնական գազի մոտ կեսը և հեղուկացված նավթային գազի մոտ 90%-ը անցնում էին Հորմուզի նեղուցով։