2 րոպեի ընթերցում
Գեղարքունիքի մարզի Մարտունի և Վարդենիս համայնքներում 2026 թվականի հունիսի 29-ից տրվեց ամառային զորակոչի մեկնարկը։
«Արմենպրես»-ի փոխանցմամբ՝ Մարտունիի զինվորական կոմիսարիատում նորակոչիկներին բանակ ճանապարհելու հանդիսավոր արարողությանը մասնակցել ու հաջողություններ են մաղթել Գեղարքունիքի մարզպետ Կարեն Սարգսյանը, Մարտունի համայնքի ղեկավար Հովհաննես Հովեյանը, ՀՀ ՊՆ Գեղարքունիքի մարզի զինվորական կոմիսար Արմեն Մնացականյանը, ՀՀ ՆԳՆ Ոստիկանության գլխավոր վարչության Մարտունիի բաժնի պետ Ստեփան Հակոբյանը, Հայ Առաքելական եկեղեցու Գեղարքունյաց թեմի Մարտունիի տարածաշրջանի հոգևոր հովիվ Տեր Գևորգ քահանա Բարսեղյանը, պաշտոնական այլ անձինք, նորակոչիկների ծնողներն ու հարազատները։
«Իմ խնդրանքն ու հորդորն այն է, որ լինեք չափազանց հոգատար ձեր ծառայակից ընկերների հանդեպ, անվերապահորեն կատարեք ձեր հրամանատարների հրամանները, դպրոցում ստացած ձեր գիտելիքներն ու կարողություններն առավելագույնս օգտագործեք հայրենիքի ծառայության ընթացքում։ Բարի երթ, խաղաղ ու անվտանգ ծառայություն եմ մաղթում բոլորիդ»,-նորակոչիկներին դիմել է Գեղարքունիքի մարզպետ Կարեն Սարգսյանը։
Վարդենիսում նորակոչիկներին բանակ ճանապարհելու հանդիսավոր արարողությանը մասնակցել ու նորակոչիկներին հաջողություններ մաղթել համայնքի ղեկավարի խորհրդական Խաժակ Մկրտչյանը, ՀՀ ՊՆ Վարդենիսի զինվորական կոմիսար Կամսար Հարությունյանը, ՀՀ ՆԳՆ Ոստիկանության գլխավոր վարչության Վարդենիսի բաժնի ներկայացուցիչներ, պաշտոնական այլ անձինք, նորակոչիկների ծնողները և հարազատները։
Հուլիսի 1-ին նորակոչիկների հերթական խմբերը Հայոց բանակ կճանապարհվեն Գավառ, Սևան և Ճամբարակ համայնքներից։
Ամառային զորակոչը Գեղարքունիքի մարզում կշարունակվի մինչև 2026 թվականի օգոստոսի 15-ը։