Մակրոնը հայտնել է Սիցիլիայի ափերին ՌԴ-ի հետ կապված լցանավ կալանելու մասին

Ֆրանսիայի նախագահ Էմանուել Մակրոնը հայտարարել է, որ երկրի ռազմածովային ուժերը Սիցիլիայի ափերի մոտ կալանել են Ռուսաստանի հետ կապված նավթատար լցանավ։ «Արմենպրես»-ի փոխանցմամբ՝ այս մասին նա գրել է X հարթակում՝ կից հրապարակելով համապատասխան տեսանյութը։

«Երեքշաբթի օրը (հունիսի 23-ին) ֆրանսիական ռազմածովային ուժերը բարձրացել են Deliver լցանավի վրա, որը նավարկում էր Սիցիլիայի ափերի մոտ՝ խախտելով ծովային իրավունքը», - գրել է նա։

La Marine Nationale a arraisonné mardi le pétrolier Deliver alors qu’il transitait au large de la Sicile en infraction avec le droit de la mer.

Cette nouvelle action contre la flotte fantôme, conduite quelques jours après une opération similaire par le Royaume-Uni… pic.twitter.com/5Gjn43MhLr

— Emmanuel Macron (@EmmanuelMacron) June 25, 2026

Մակրոնը նշել է, որ Deliver-ը կապված է Ռուսաստանի «ստվերային նավատորմի» հետ, որն օգտագործվում է 2022 թվականին Ռուսաստանի կողմից Ուկրաինայում ռազմական գործողությունների ծավալումից հետո Արևմուտքի սահմանած պատժամիջոցները շրջանցելու համար։

«Ստվերային նավատորմի դեմ այս վերջին գործողությունը, որն իրականացվել է Միացյալ Թագավորության կողմից նմանատիպ գործողությունից ընդամենը մի քանի օր անց, ցույց է տալիս եվրոպացիների վճռականությունը։ Մենք թույլ չենք տա, որ ստվերային նավատորմը խուսափի պատժամիջոցներից և ֆինանսավորի Ռուսաստանի պատերազմը։ Եվրոպան վճռական է։ Այն կձեռնարկի բոլոր անհրաժեշտ ջանքերը՝ Ռուսաստանի համար պատերազմի արժեքը մեծացնելու և Ուկրաինայում ամուր ու երկարատև խաղաղության հաստատմանը նպաստելու համար», - հավելել է Ֆրանսիայի ղեկավարը։

AFP-ի տվյալներով՝ 2025 թ. սեպտեմբերից ի վեր Ֆրանսիան կալանել է ևս չորս նավ, որոնք, ենթադրաբար, պատկանում են ռուսական «ստվերային նավատորմին»։