ԱԷՄԳ-ի մասնագետները վաղ թե ուշ տեսչական ստուգումներ կկատարեն Իրանի միջուկային օբյեկտներում. Գրոսի

Ատոմային էներգիայի միջազգային գործակալության (ԱԷՄԳ) մասնագետները վաղ թե ուշ կսկսեն Իրանի միջուկային օբյեկտների տեսչական ստուգումները, համապատասխան կետը բովանդակում է ԱՄՆ-ի և Իրանի միջև փոխըմբռնման հուշագիրը: «Արմենպրես»-ի հաղորդմամբ՝ այդ մասին հայտարարել է Ատոմային էներգիայի միջազգային գործակալության ղեկավար Ռաֆայել Գրոսին Ճապոնիայի «Ֆուկուսիմա-1» ատոմակայան այցելության ժամանակ, որտեղ շարունակվում է մաքրված ջրի օվկիանոս արտանետման գործընթացը:

«Հուշագրում հստակ նշված է, որ միջուկային նյութեր օգտագործող օբյեկտների գործունեությունը տեղի կունենա ԱԷՄԳ-ի հսկողության ներքո: Ակնհայտ է, որ դրա համար անհրաժեշտ են տեսչական ստուգումներ, և դրանք կլինեն», - մեջբերել է Գրոսիի խոսքն Associated Press գործակալությունը:

Միևնույն ժամանակ ԱԷՄԳ-ի ղեկավարը նշել է, որ այս պահին որոշված չէ, թե երբ կարող են սկսվել այդ ստուգումները: «Դա տեղի կունենա արդյոք վաղը չէ մյուս օրը, մեկ շաբաթից կամ 10 օրից կարևոր հարց է, բայց ոչ անհետաձգելի», - հավելել է նա:

ԱՄՆ-ն և Իրանն ստորագրել են փոխըմբռնման հուշագիր, որը նախատեսում է մարտական գործողությունների անհապաղ դադարեցում բոլոր ճակատներում, այդ թվում՝ Լիբանանում: Հունիսի 21-22-ը Շվեյցարիայի Բյուրգենշտոկ հանգստավայրում Կատարի և Պակիստանի միջնորդությամբ տեղի ունեցան ԱՄՆ-ի և Իրանի բանակցությունները հուշագրի վերաբերյալ։ Հետագայում Իրանի արտաքին գործերի նախարարության ներկայացուցիչ Էսմայիլ Բաղային հայտարարել է, որ Թեհրանը Բյուրգենշտոկում Ատոմային էներգիայի միջազգային գործակալության հետ չի քննարկել իր միջուկային օբյեկտների նոր տեսչական ստուգումների հարցը: