Հայաստանն ու ԱՄՆ-ն տրամադրված են արագ առաջ շարժվել TRIPP-ի իրագործման ուղղությամբ. Փաշինյան
2 րոպեի ընթերցում
Հայաստանի Հանրապետության վարչապետ Նիկոլ Փաշինյանը հայտարարել է, որ Երևանն ու Վաշինգտոնը տրամադրված են արագ առաջ շարժվել «Թրամփի ուղի՝ հանուն միջազգային խաղաղության և միջազգային բարգավաճման» (TRIPP) նախագծի կյանքի կոչման ուղղությամբ։
ՀՀ վարչապետն այս մասին նշել է կառավարության նիստից հետո անցկացվող ճեպազրույցի ընթացքում՝ պատասխանելով ԹՐԻՓՓ նախագծի ընթացքի վերաբերյալ «Արմենպրես»-ի թղթակցի հարցին։
Վարչապետը, մասնավորապես խոսելով նախագծի կյանքի կոչման համար անհրաժեշտ ներդրումների առկայության և կապիտալի մասին, ընդգծել է, որ Միացյալ Նահանգներն այդ նախագծի ֆինանասավորման վերաբերյալ առնվազն նախնական որոշում ՝ կայացրել և ֆոնդ է ստեղծել, որով պետք է ֆինանսավորեն տարածաշրջանային նախագծերը, այդ թվում՝ ԹՐԻՓՓ նախագիծը։
«Արդեն մեծ ֆոնդի հատկացում է կատարվել, իսկ մնացած մասով էլ Հայաստանի Հանրապետությունն իր պարտավորությունները, բնականաբար, կկատարի։ Փաստաթուղթը ստորագրվեց (խմբ․՝ նկատի ունի ՀՀ ԱԳ նախարար Արարատ Միրզոյանի և ԱՄՆ պետքարտուղար Մարկո Ռուբիոյի կողմից ստորագրված համաձայնագիրը՝ ԹՐԻՓՓ-ի վերաբերյալ), հիմա վավերացման փուլն է, բայց մենք պետք է ֆորմալություններին չսպասենք, պետք է հնարավորինս արագ գնանք առաջ։ Դա է մեր ու Միացյալ Նահանգների տրամադրվածությունը»,-ընդգծել է վարչապետ Փաշինյանը։