1 րոպեի ընթերցում
Ազգային ժողովի օրակարգ կբերվի օրենսդրական նախաձեռնություն, որով նախատեսվում է փոփոխություն կատարել «Ազգային ժողովի կանոնակարգ» սահմանադրական օրենքում և փոխել պատգամավորների երդման տեքստը։ «Արմենպրես»-ի հաղորդմամբ՝ այս մասին տեսանյութում հայտնել է Ազգային ժողովի նախագահ Ալեն Սիմոնյանը։
Նրա խոսքով՝ պատգամավորների երդման նոր տեքստը կլինի ավելի համահունչ այսօրվա իրականությանը, Հայաստանի պետականությանը և գործող օրենսդրությանը։
«Պատգամավորների երդման տեքստը կփոփոխվի։ Այն կդառնա շատ ավելի համահունչ այսօրվա իրականությանը, այսօրվա իրական պետությանը և մեր օրենսդրությանը»,-նշել է Սիմոնյանը։
ԱԺ նախագահը հավելել է, որ երդման նոր տեքստում անդրադարձ կլինի նաև հայ ժողովրդի համար կարևոր արժեքներին։
«Մեր հայ ժողովրդին բնորոշ և հայ ժողովրդի համար կարևոր բաների մասին կլինի տեքստը, որը ես քիչ անց կտեղադրեմ, նաև կարող եք ծանոթանալ այդ տեքստի հետ»,-ասել է նա։