3 րոպեի ընթերցում
«Ռոսսելխոզնադզոր»-ը 2026 թվականի հունիսի 12-ից սահմանափակելու է Հայաստանից կարանտինային ապրանքների ներմուծումը։
Ինչպես հաղորդում է «Արմենպրես»-ը, վկայակոչելով «Ինտերֆաքս»-ը, այս մասին հայտնում է «Ռոսսելխոզնադզոր»-ը։
Նշվում է, որ դա վերաբերում է ինչպես ՀՀ-ում արտադրվող, այնպես էլ այնտեղից առաքվող ապրանքներին։ «Սահմանափակված է նաև Ռուսաստանի տարածքով ԵԱՏՄ անդամ պետություններ տարանցումը։ Արգելքն ուժի մեջ կմնա մինչև առաքվող ապրանքների անվտանգությունն ու հետագծելիությունն ապահովելու հատուկ ալգորիթմի մշակումը»,- ասվում է հայտարարության մեջ։
Ընդգծվում է, որ նման որոշում է կայացվել կարանտինային ապրանքների համակարգված հայտնաբերման պատճառով։ «Սկսած այս տարվա մայիսից՝ ծառայությունն աստիճանաբար սահմանափակել է հայկական կարանտինային ապրանքների որոշակի տեսակների ներմուծումը և բազմիցս տեղեկատվություն է ուղարկել հայկական կողմին մատակարարման խափանումների մասին։ Չնայած դրան՝ կարանտինային օբյեկտների հայտնաբերումները շարունակվում են։ Հունիսին կապրա բզեզով վարակի երեք դեպք է հայտնաբերվել Հայաստանից ներմուծված ընկույզների, չորացրած դեղձերի և չորացրած լոլիկների մեջ», - նշել է «Ռոսսելխոզնադզոր»-ը։
Ըստ ծառայության՝ դա իբր վկայում է Հայաստանի լիազոր մարմնի կողմից անբավարար վերահսկողության մասին և խթանում է բուսասանիտարական հավաստագրման համակարգի նկատմամբ անվստահությունը: «Բույսերի կարանտինի և պաշտպանության Հայաստանի ծառայության անարդյունավետությունը սպառնում է Ռուսաստանի և ԵԱՏՄ-ի բուսասանիտարական բարեկեցությանը», - ընդգծում է «Ռոսսելխոզնադզոր»-ն ու հավելում՝ կապրա բզեզը պահեստավորված արտադրանքի վնասատու է, որը բացակայում է Ռուսաստանում:
Նշվում է, որ այն վնասում է հացահատիկային, յուղատու մշակաբույսերին, լոբազգիներին, արդյունաբերական մշակաբույսերին և դրանց ենթամթերքներին, ինչպես նաև անտառային, դեկորատիվ և այլ մշակաբույսերին: «Այն կարող է վարակել հացահատիկի պահեստավորման օբյեկտները, տրանսպորտային միջոցները, հումքի և ալյուրի պահեստները, ջրաղացները, կերերի գործարանները, հրուշակեղենի գործարանները, ածիկի պահեստավորման օբյեկտները և այլն: Այն կարող է ոչնչացնել պահեստավորված արտադրանքի մինչև 70 տոկոսը»,-ասվում է հայտարարության մեջ։
«Ռոսսելխոզնադզոր»-ը նշում է՝ Ռուսաստանի Դաշնությանը տնտեսական վնասը կարող է առաջանալ ոչ միայն բերքի կորստից և բռնկումների զսպման ու վերացման միջոցառումներից, այլև արտահանման շուկաների հնարավոր կորստից այն երկրներում, որտեղ այս վնասատուն կարանտինային տեսակ չէ։
Ռուսաստանը վերջին շրջանում սահմանափակել կամ ընդհանրապես արգելել է հայկական բազմաթիվ ապրանքների ներմուծումը՝ այդ որոշումները պատճառաբանելով տարատեսակ խախտումների հայտնաբերմամբ։ Ռուսաստանի կողմից այդպիսի գործողությունները հատկապես ակտիվացել էին Հայաստանի խորհրդարանական ընտրություններին ընդառաջ։