Ռուսաստանը պատրաստ է Վրաստանի հետ համագործակցության ընդլայնման. Զախարովա

Ռուսաստանը պատրաստ է խորացնել ռուս-վրացական կապերը փոխադարձ հարգանքի հիման վրա։ «Արմենպրես»-ի փոխանցմամբ՝ այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ։

«Մենք ըմբռնումով ենք մոտենում Թբիլիսիի փորձերին՝ վերջ դնել արտաքին թելադրանքներին և փոխգործակցել օտարերկրյա գործընկերների հետ հավասար, փոխադարձ հարգանքի հիմունքներով», - նշել է Զախարովան։

«Մենք պատրաստ ենք խորացնել ռուս-վրացական կապերը, որոնք Վրաստանի տնտեսական վերականգնման հիմնական գործոններից մեկն են։ Մենք դա անում ենք մաքուր սրտով և բաց մտքով», - հավելել է նա։

Նա նշել է նաև, որ Մոսկվան «բաց է Թբիլիսիի հետ համագործակցության ընդլայնման համար»՝ փոխադարձ հարգանքի հիման վրա։

«Թբիլիսին վճռական և գիտակցված ընտրություն է կատարել՝ հօգուտ երկրի ինքնիշխանության վերականգնման, վրաց ժողովրդի շահերի ապահովման, և, կավելացնեմ նաև, երկրի և ժողովրդի արժանապատվության», - ասել է դիվանագետը։