3 րոպեի ընթերցում
Լիբանանյան «Հեզբոլլահ» խմբավորումը հայտարարել է, որ Լիբանանի ուղղությամբ հարվածներին ի պատասխան Իրանի գրոհներն Իսրայելի վրա «բարոյական, քաղաքական և գործնական նվիրվածության» ուղերձ էին։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
Խմբավորումը կոչ է արել Լիբանանի կառավարությանն օգտվել առիթից և «շտկել հարաբերությունները Իրանի հետ»՝ ի շահ երկու երկրների։
Խմբավորումը նաև կոչ է արել Լիբանանի իշխանություններին օգտվել «Իրանի աջակցությունից՝ նպատակներին հասնելու համար»։ «Հեզբոլլահ»-ը նշել է, որ բանակցությունների արդյունքում կլինի «տարածաշրջանային հովանոց»։
«Հեզբոլլահ»-ի կոչը հնչել է այն բանից հետո, երբ Իրանը հուլիսի 7-ին և 8-ին հրթիռային հարվածներ է հասցրել Իսրայելին՝ ի պատասխան Բեյրութի հարավային արվարձանների ուղղությամբ իսրայելական հարձակումների, որոնց ընթացքում թիրախավորվել են շարժման օբյեկտները։ Իսրայելը պատասխան հարվածներ է հասցրել Իրանին, որից հետո ԱՄՆ նախագահ Դոնալդ Թրամփը հայտարարեց, որ կողմերը համաձայնել են դադարեցնել փոխադարձ գրոհները։
Թեհրանը հայտարարել է, որ կդադարեցնի հարվածները, սակայն միաժամանակ զգուշացրել է, որ կրկին կհարձակվի Իսրայելի վրա, եթե վերջինս շարունակի իր հարձակումները Լիբանանում։ Իր հերթին, Իսրայելը խոստացել է շարունակել գործողությունները Լիբանանում և սպառնացել է ուժգին պատասխան հասցնել, եթե Իրանը կրկին հարձակվի։
Ավելի վաղ Լիբանանի նախագահ Ժոզեֆ Աունը պահանջել էր, որ Իրանը չմիջամտի իր երկրի գործերին։
«Սա ձեր երկիրը չէ, սա մեր երկիրն է, և ձեր պարտականությունը կամ գործը չէ միջամտել մեր երկրի գործերին», - CNN-ի հետ հարցազրույցում նշել էր նա։
Բեյրութի և Թեհրանի միջև հարաբերությունները վատթարացել են այն բանից հետո, երբ մարտի 2-ին «Հեզբոլլահ»-ը հրթիռներ արձակեց Իսրայելի վրա՝ ի պատասխան Իրանի գերագույն առաջնորդ Ալի Խամենեիի սպանության։ Դրան հաջորդեցին Իսրայելի կողմից հարավային և արևելյան Լիբանանում և Բեյրութի արվարձաններում ինտենսիվ ավիահարվածներն ու ռազմական գործողությունները, որոնք հանգեցրին լայնածավալ ավերածությունների, հազարավոր մարդկանց մահվան և միլիոնից ավելի բնակիչների տեղահանման։