Հայ և լեհ գործարարների բանակցությունների արդյունքում հայկական ծիրանով բեռնված 20 բեռնատար մեքենաներ կմեկնեն Լեհաստան
2 րոպեի ընթերցում
Հայաստանը փորձում է դիվերսիֆիկացնել իր արտաքին տնտեսական կապերն ու հայկական ապրանքների համար արտասահմանում գտնել իրացման նոր շուկաներ։ Երևանում կայացավ հայ-լեհական գործարար համաժողովը, որի շրջանակում քննարկվեցին հայկական արտադրանքը մասնավորապես Լեհաստան արտահանելու հնարավորությունները։
«Արմենպրես»-ի հետ զրույցում լեհական «HAYWAY GROUP» ընկերության հիմնադիր և գլխավոր տնօրեն Արթուր Լևանդովսկին հայտնեց, որ հայ և լեհ գործարարների միջև տեղի են ունեցել գործնական շփումներ, որոնք նպաստելու են երկկողմ տնտեսական կապերի ամրապնդմանը։
«Այս պահին ընթանում են բանակցություններ, և գործնական քայլերից մեկն էլ լինելու այն, որ հունիսի վերջին հայկական ծիրանով բեռնված 20 բեռնատար մեքենաներ կմեկնեն Լեհաստան։ Աշխատանքներ են ընթանում, որպեսզի ձեռք բերվեն համապատասխան սերտիֆիկատներ և ապրանքները հնարավորինս շուտ արտահանվեն Լեհաստան։ Սկսելու ենք ծիրանի արտահանումից»,- ասաց Լևանդովսկին։
Հիշեցնենք, որ օրեր առաջ Ռուսաստանը սահմանափակումներ էր կիրառել հայկական մրգերի, այդ թվում՝ ծիրանի ներմուծման վրա։ Ռուսաստանի կողմից հայկական ապրանքների ներմուծման սահմանափակումների և արգելքների ֆոնին Եվրամիությունն արդեն հայտարարել է Հայաստանին աջակցության փաթեթ նախապատրաստելու մասին, որի շրջանակում Հայաստանը 50 միլիոն եվրոյի ֆինանսական աջակցություն կստանա, ինչպես նաև լրացուցիչ միջոցառումներ՝ հայկական արտադրանքի արտահանման հնարավորությունների ընդլայնման և առևտրի դյուրացման նպատակով։