Բելգիայի փոխվարչապետը շնորհավորել է Հայաստանի ժողովրդին՝ ժողովրդավարությանը հավատարմության համար

Բելգիայի փոխվարչապետ, երկրի արտաքին ու եվրոպական գործերի և զարգացման համագործակցության նախարար Մաքսիմ Պրևոն ՀՀ ԱԳ նախարար Արարատ Միրզոյանին ուղղված ուղերձում շնորհավորել է Հայաստանի ժողովրդին՝ հունիսի 7-ի խորհրդարանական ընտրություններում ժողովրդավարությանը հավատարիմ մնալու հանձնառությունը հաստատելու համար:

«Արմենպրես»-ի հաղորդմամբ՝ այս մասին նա նշել է X սոցիալական ցանցում կատարած գրառման մեջ:

«Շնորհավորում եմ Հայաստանի ժողովրդին՝ ժողովրդավարական գործընթացներին ակտիվ մասնակցության համար։ Չնայած ճնշումներին և միջամտություններին, նրանք վերահաստատեցին իրենց հանձնառությունը ժողովրդավարությանը, խաղաղությանը և Եվրոպայի հետ ավելի սերտ կապերին։ Հուսով ենք, այս նոր մանդատը կնպաստի տարածաշրջանում խաղաղությանը, կայունությանը և բարգավաճմանը։ Անհամբերությամբ սպասում եմ Հայաստանի հետ մեր գործընկերության հետագա ամրապնդմանը և հանուն խաղաղ ապագայի համատեղ աշխատանքին»,- նշել է Մաքսիմ Պրևոն:

🇦🇲 Congratulations to the people of Armenia for their strong democratic participation. Despite pressure and interference, they reaffirmed their commitment to democracy, peace and closer ties with Europe.

We hope this new mandate will contribute to peace, stability, and…

— Maxime PREVOT (@prevotmaxime) June 8, 2026

Հայաստանում հունիսի 7-ին կայացած խորհրդարանական ընտրությունների նախնական արդյունքներով խորհրդարան մտնելու անցողիկ շեմը հաղթահարել է երեք քաղաքական ուժ՝ «Քաղաքացիական պայմանագիր» կուսակցությունը՝ 727 հազար 160 կամ 49,825 տոկոս ձայներով, «Ուժեղ Հայաստան» դաշինքը՝ 340 հազար 88 կամ 23,281 տոկոս ձայներով, «Հայաստան» դաշինք՝ 145 հազար 113 կամ 9,934 տոկոս ձայներով։  «Քաղաքացիական պայմանագիր» կուսակցությունը քվեարկության նախնական արդյունքներով կկարողանա մեծամասնություն ստանալ խորհրդարանում և ձևավորել կառավարություն։