3 րոպեի ընթերցում
Ֆրանսիայի նախագահ Էմանուել Մակրոնը հունիսի 5-ին ողջունել է Ուկրաինայի նախագահ Վոլոդիմիր Զելենսկու կոչը՝ Ռուսաստանի նախագահ Վլադիմիր Պուտինի հետ ուղիղ բանակցություններ վարելու վերաբերյալ՝ նշելով, որ ժամանակն է վերսկսել երկխոսությունը Մոսկվայի հետ։ «Արմենպրես»-ի փոխանցմամբ՝ այս մասին հաղորդում է ֆրանսիական Le Monde պարբերականը։
«Ես կարծում եմ, որ այժմ Ուկրաինայից և Ռուսաստանից է կախված հաստատել թե՛ հրադադար, թե՛ խաղաղության ծրագիր։ Եվրոպացիներն են, որ կարող են օգնել այս հարցում», - ասել է Մակրոնը Չեռնոգորիայում Եվրոպական միության և Բալկանյան երկրների առաջնորդների գագաթնաժողովում։
Ավելի վաղ Զելենսկին Ռուսաստանի առաջնորդին ուղղված բաց նամակում առաջարկել էր անձամբ հանդիպել Վլադիմիր Պուտինի հետ։
Մակրոնը նամակը համարել է «լավ նախաձեռնություն»։ Նա նշել է, որ ցանկանում է «նայել ապագային և քննարկել, թե ինչպես կարող են վերականգնել երկխոսությունը՝ հրադադարի և խաղաղության հաստատման համար»։
«Կարծում եմ՝ հիմա ժամանակն է՝ հաշվի առնելով, թե ինչպես է զարգանում իրավիճակը», - շեշտել է նա։
«Մենք նաև շատ ենք ցանկանում Ռուսաստանի հետ ունենալ քննարկումներ և մտքերի փոխանակումներ մեր ընդհանուր հետաքրքրություն ներկայացնող հարցերի շուրջ, այսինքն՝ մեր սեփական անվտանգությունը, այն, թե ինչպես ենք մենք գոյակցում որպես հարևաններ, և, իհարկե, Ուկրաինայի շահերը պաշտպանելու համար», - ասել է Մակրոնը։
Մակրոնը նաև նշել է, որ առաջիկա օրերին կհանդիպի Զելենսկու հետ՝ ընդգծելով, որ հուլիսի 14-ին ազգային տոնի առթիվ Փարիզ է հրավիրել արևմտյան երկրներին, որոնք ներգրավված են «կամեցողների կոալիցիայում»՝ աջակցելու հրադադարի մասին ցանկացած համաձայնագիր կնքելուն։
Եվրոպայում բուռն քննարկումներ են ծավալվել Ուկրաինայի հարցով Ռուսաստանի հետ երկխոսությունը վերսկսելու վերաբերյալ, քանի որ ԱՄՆ-ի միջնորդությամբ հրադադարի շուրջ բանակցությունները դադարեցվել են:
ԵՄ-ն և Գերմանիան նույնպես ողջունել են Զելենսկու կոչը՝ Կրեմլի ղեկավարի հետ ուղիղ բանակցություններ վարելու վերաբերյալ։