2 րոպեի ընթերցում
Քուվեյթի արտաքին գործերի նախարարությունը հայտնել է, որ երկրի միջազգային օդանավակայանի տերմինալի վրա իրանական անօդաչու թռչող սարքերի և հրթիռների հարվածների հետևանքով մեկ մարդ է զոհվել։ «Արմենպրես»-ի փոխանցմամբ՝ այս մասին հաղորդում է Քուվեյթի Kuna գործակալությունը։
«Հարձակումների հետևանքով մեկ մարդ զոհվել է, մի քանիսը վիրավորվել են, ինչպես նաև վնասվել են կենսական նշանակության օբյեկտներ, այդ թվում՝ դիվանագիտական առաքելություններ», - նշվում է հայտարարության մեջ։
Նախարարությունը նաև հայտնել է, որ Քուվեյթի Պետությունը «կտրականապես մերժում է Իրանի ակնհայտ ագրեսիայի գործողությունները, որոնք սրում են լարվածությունը, բարձրացնում հակամարտության մակարդակը և խաթարում տարածաշրջանի անվտանգությունն ու կայունությունը»։
Գործակալությունը տեղեկացրում է, որ Կատարը և ԱՄԷ-ն դատապարտել են Քուվեյթի վրա իրանական հարձակումները՝ դրանք որակելով երկրի ինքնիշխանության և միջազգային մարդասիրական իրավունքի սկզբունքների կոպիտ խախտում։
Քուվեյթի միջազգային օդանավակայանը հայտարարել է, որ վերսկսել է Kuwait Airways-ի չվերթերը 4-րդ տերմինալից. դրանք դադարեցվել էին Իրանի կողմից անօդաչու թռչող սարքերի և հրթիռների հարվածներից հետո։
Թեհրանն իր հերթին հայտարարել է, որ Քուվեյթը և Բահրեյնը «ուղղակի և հստակ պատասխանատվություն» են կրում ԱՄՆ-ի կողմից Իրանի վրա հարձակումների համար՝ պնդելով, որ այդ երկրների տարածքն ու կառույցներն օգտագործվել են Իրանի դեմ ԱՄՆ ռազմական գործողություններին աջակցելու համար։
Իրանը նաև նշել է, որ Քուվեյթի և Բահրեյնի վրա հարձակումներն «ԱՄՆ ագրեսիայի» պատասխանն են։